Google-ის ახალი სერვისი

Google-ის კიდევ ერთი უაღრესად საინტერესო ინიციატივა. დღეს ამოქმედდა ახალი სერვისი სახელწოდებით Knol.

ამ საიტზე გამოქვეყნდება სპეციფიურ თემებთან დაკავშირებული ავტორიტეტული სტატიები, რომლებიც ხელმისაწვდომი იქნება ინტერნეტის ნებისმიერი მომხმარებლისათვის. ამ სტატიებს დაწერენ მხოლოდ შესაბამისი საგნის მცოდნე ადამიანები. შეიძლება ითქვას, რომ სერვისი ავტორებზეა ფოკუსირებული. ეს არის Knol-ის მთავარი გასხვავება Wikipedia-სგან. სტაიები არ იქნება ანონიმური. ყოველი სტატიისათვის მითითებულია მისი ავტორის სახელი და ავტორის მოკლე ბიოგრაფია.

სერვისი საშუალებას აძლევს ადამიანებს გაუზიარონ საკუთარი ცოდნა მთელ მსოფლიოს. ერთ თემაზე შეიძლება რამოდენიმე სხვადასხვა ავტორის სტატია გამოქვეყნდეს. ყველა მკითხველს ექნება წაკითხულის კომენტირების, რეიტინგის მინიჭების, მიმოხილვების გამოქვეყნების საშუალება.

შესაძლებელი იქნება სამი დონის თანამშრომლობა:
Open collaboration - ღია თანამშრომლობა (ნებისმიერ მომხმარებელს აქვს სტატიის რედაქტირების შესაძლებლობა)
Moderate collaboration - ზომიერი თანამშრომლობა (ნებისმიერ მომხმარებელს აქვს შესაძლებლობა შესთავაზოს ავტორს ცვლილებები სტატიაში)
Closed collaboration - დახურული თანამშრომლობა (მხოლოდ თანაავტორს აქვს სტატიის რედაქტირების შესაძლებლობა).

ჩემი აზრით სერვისს დიდი პოტენციალი აქვს და ის Wikipedia-ზე არანაკლებ პოპულარული გახდება.

წარმოგიდგენთ ბმულს ერთ-ერთ სტატიაზე, სახელწოდებით ”Tooth pain” (კბილის ტკივილი), რომელიც გამოქვეყნებულია Knol-ზე.

კომენტარი კომენტარზე

წავიკითხე Frank Krasicki-ის კომენტარი ერთ-ერთ ბლოგში. მოვიყვან ერთ ციტატას ამ კომენტარიდან:

When most people think of school they imagine a brick-and-mortar place. What technology does is transcend physical spaces as by allowing children to reach each other across the globe.

მე ვიზიარებ ამ აზრს.
ტერმინი ”სკოლა” შეიძლება დარჩეს მომავალშიც, მაგრამ ეს იქნება არა შენობა, სადაც თავს იყრიან მოსწავლეები, არამედ იმ online და offline სივრცეების, აქტივობებისა და ურთიერთობების ერთობლიობა, რომელიც მთავარ როლს შეასრულებს ბავშვების სწავლასა და განვითარებაში.

ამ გარემოში მასწავლებელს ექნება უფროსი მოსწავლის როლი, რომელიც აქტიურად სწავლობს თვითონ და ეხმარება სწავლაში ბავშვებს. მისი მთავარი ამოცანაა - მოახდინოს მოსწავლეების ონლაინ და პირისპირ ურთიერთობების ფასილიტაცია, განუვითაროს მათ სწავლის მოტივაცია, ჩართოს ისინი საკუთარი სწავლის დაგეგმვასა და განხორციელებაში, რეკომენდაცია გაუწიოს მათთვის სასარგებლო და საინტერესო აქტივობებს და პროექტებს და დაეხმაროს მათ რეალიზაციაში.

მომავლის სკოლაში მასწავლებელი საინტერესო იქნება არა იმ ცოდნით, რომელიც მას გააჩნია, არამედ იმით, თუ რამდენად არის ის თანამედროვე მოსწავლის მოდელი. სხვა სიტყვებით - მასწავლებელი უნდა გახდეს ”სანიმუშო მოსწავლე” მისი მოსწავლეებისათვის. მან უნდა ასწავლოს მათ სწავლა, ხშირ შემთხვევაში, საკუთარ მაგალითზე და ასევე იმ საინტერესო მაგალითებზე, რომლებიც უხვადაა გაფანტული ინტერნეტში.

მომავალი სკოლის ”საკლასო ოთახი” შეიძლება წარმოვიდგინოთ როგორც ონლაინ სასწავლო თემი, სადაც ბავშვები და მასწავლებლები (შეიძლება დედამიწის სხვადასხვა კუთხიდან) ერთად სწავლობენ, ქმნიან ერთობლივ პროექტებს, აფასებენ ერთმანეთის ნამუშევრებს, უზიარებენ ერთმანეთს აზრებს, შეხედულებებს, კულტურულ ფასეულობებს. მოდელი - ”რამოდენიმე გლობალური მასწავლებელი და გლობალური მოსწავლეები” შეიძლება მომავალში საკმაოდ პოპულარული გახდეს სწავლაში. ამ მოდელში ასევე მნიშვნელოვან ადგილს დაიკავებს მშობელი, რომელსაც სრული საშუალება ექნება თვალყური ადევნოს საკუთარი შვილის ონლაინ სასწავლო აქტივობებს და სურვილის ან საჭიროების შემთხვევაში თვითონ ჩაერთოს ამ აქტივობებში.
კომუნიკაცია, ერთობლივი მუშაობა, ცოდნის გაზიარება, აუტენტური შეფასება - ზემოთ აღწერილი მოდელის ძირითადი მახასიათებლებია.

ზოგს შეიძლება ეს ყველაფერი მოეჩვენოს უსარგებლო ფანტაზიებად, მაგრამ ტექნოლოგიების, ეკონომიკისა და განათლების განვითარების თანამედროვე ტენდენციები, ჩემი აზრით, მკაფიოდ მიანიშნებენ, რომ ტრადიციული სკოლის მოდელი, ეგრეთწოდებული ”ფაბრიკის მოდელი” ვეღარ აკმაყოფილებს თანამედროვე საზოგადოების მოთხოვნებს.

საინტერესო საიტები - 12 ივლისი

The Periodic Table Of Videos
ქიმიური ელემენტების პერიოდული ცხრილი. თითოეულ ელემენტთან დაკავშირებული ვიდეოფრაგმენტი, სადაც ასახულია ამ ელემენტის თვისებები.

US National Science Foundation's Multimedia Gallery
საბუნებისმეტყველო საგნებთან დაკავშირებული მულტიმედიური რესურსები (2000-ზე მეტი მულტიმედიური ობიექტი).

ტექნოლოგიური სტანდარტი მასწავლებელთათვის

ISTE-მ მოამზადა ახალი ეროვნული საგანმანათლებლო ტექნოლოგიური სტანდარტი მასწავლებელთათვის (NETS for Teachers 2008). 2007 წელს მე გამოვაქვეყნე მათ მიერ მომზადებული ტექნოლოგიური სტანდარტი მოსწავლეთათვის.

სტანდარტის წინა ვერსია გამოქვეყნდა 2000 წელს.
სტანდარტის ახალი ვერსიის აუცილებლობა გამოწვეულია ტექნოლოგიების სწრაფი ცვლილებებით, რომლებიც ახალ მოთხოვნებს აყენებენ მოსწავლეებისა და მასწავლებლების წინაშე.
ეს სტანდარტი დაეხმარება მასწავლებლებს ინდუსტრიული ერას სასწავლო გარემოს ციფრულ ერას გარემოდ გარდაქმნაში.

მნიშვნელოვნად შეიცვალა სტანდარტის პრიორიტეტები წინა ვერსიასთან შედარებით. ახლა გაცილებით მეტი ყურადღება ექცევა მოსწავლეთა ერთობლივი, შემოქმედებითი სწავლების უზრუნველყოფის , ციფრულ საზოგადოებაში წარმატებული ცხოვრებისათვის საჭირო უნარების და დამოკიდებულებების განვითარების საკითხებს.

სტანდარტის გაცნობა სასარგებლო იქნება ყველასათვის ვისაც აქვს შეხება განათლებასთან, განსაკუთრებით კი - მასწავლებლებისათვის.

სტანდარტი მოიცავს ხუთ მიმართულებას. ქვემოთ მოყვანილია ამ მიმართულებების მოკლე დახასიათება.

1. მოსწავლეთა სწავლისა და შემოქმედების მხარდაჭერა და შთაგონება.
მასწავლებლები იყენებენ საგნის, სწავლისა და სწავლების და ტექნოლოგიების ცოდნას, რათა უზრუნველყონ ისეთი სასწავლო პრაქტიკა როგორც საკლასო, ასევე ვირტუალურ გარემოში, რომელიც გააძლიერებს მოსწავლეთა სწავლას, შემოქმედებას და ინოვაციას.

2. ციფრული ერას სასწავლო პრაქტიკისა და შეფასების დაგეგმვა და შემუშავება
მასწავლებლები ახდენენ აუტენტური სასწავლო პრაქტიკისა და შეფასების დაგეგმვას, შემუშავებასა და შეფასებას თანამედროვე ინსტრუმენტებისა და რესურსების გამოყენებით, რათა უზრუნველყონ შინაარსის სწავლა კონტექსტში და იმ ცოდნის, უნარებისა და დამოკიდებულებების განვითარება, რომლებიც განსაზღვრულია მოსწავლეთა ტექნოლოგიურ სტანდარტში.

3. ციფრული ერას მუშაობისა და სწავლის მოდელირება
მასწავლებლები აცნობენ მოსწავლეებს იმ ცოდნას, უნარებსა და სამუშაო პროცესებს, რომლებიც ახასიათებენ გლობალურ და ციფრულ საზოგადოებაში მოღვაწე პროფესიონალებს.

4. ციფრული მოქალაქეობისა და პასუხისმგებლობის წახალისება და მოდელირება
მასწავლებლებს ესმით ლოკალური და გლობალური საზოგადოებრივი საკითხები და პასუხისმგებლობები მზარდ ციფრულ კულტურაში და ახდენენ სამართლებრივი და ეთიკური ქცევის დემონსტრირებას პროფესიულ პრაქტიკაში.

5. ჩართულობა პროფესიულ განვითარებაში და ლიდერობა
მასწავლებლები მუდმივად ანავითარებენ საკუთარ პროფესიულ პრაქტიკას, მაგალითს აძლევენ ცხოვრების მთელ მანძილზე სწავლისა და ავლენენ ლიდერობას სკოლასა და პროფესიულ თემში ციფრული ინსტრუმენტებისა და რესურსების ეფექტიანი გამოყენების დემონსტრირებით.

Teaching Teaching and Understanding Understanding

დაახლოებით 20-წუთიანი საინტერესო ვიდეო, სადაც საუბარია სწავლაზე და სწავლებაზე უნივერსიტეტში. მისი ნახვა სწავლასთან დაკავშირებულ ბევრ საკითხზე დაგვაფიქრებს.

UNESCO - ციფრული შესაძლებლობების ინდექსი

UNESCO-ს მიერ ჩატარებული კვლევების შედეგები, სადაც წარმოდგენილია ქვეყნების შედარებითი მონაცემები ინფორმაციული საზოგადოების სხვადასხვა ასპექტებთან დაკავშირებით.

ციფრული გაყოფა (digital divide) ღარიბ და მდიდარ ქვეყნებს შორის კვლევის პერიოდში (1995-2003) უფრო გაიზარდა.

კვლევამ ასევე დაადასტურა ღრმა კავშირი ტექნოლოგიების და ეკონომიკის განვითარების დონეებს შორის.

კვლევის ინდიკატორების მიხედვით ყველაზე მაღალი შედეგები აქვთ დანიას, შვედეთს, შვეიცარიას, ნიდერლანდებს, ნორვეგიას, კანადას და აშშ-ს.

საქართველო მოხვდა საშუალოზე დაბალ მაჩვენებლიან ქვეყნებს შორის. მათ შორის არიან: უკრაინა, ირანი, ომანი, ეკვადორი, გაიანა და სხვა.

მსოფლიოში 100 ადამიანზე საშუალოდ მოდის 11 კომპიუტერი და 12 ინტერნეტის მომხმარებელი.

კვლევის შედეგების გადმოწერა. . .

არჩევნები და ახალი ტექნოლოგიები

ძალიან მნიშვნელოვან მოვლენად იქცა აშშ-ს საპრეზიდენტო არჩევნები. არა მხოლოდ იმიტომ, რომ პირველად აშშ-ს ისტორიაში შავკანიან მოქალაქეს აქვს რეალური შანსი გახდეს პრეზიდენტი. არამედ იმიტომ, რომ ობამა აწარმოებს ახალ საარჩევნო სტრატეგიას, რომელიც სრულად ემყარება საინფორმაციო საზოგადოების კანონებსა და პრინციპებს.

ობამამ გამოიყენა საფინანსო სახსრების მოზიდვის ახალი ხერხი - ონლაინ შემოწირულობები. ეს არის 200$ ნაკლები თანხები, რომლებსაც მას უგზავნიან მხარდამჭერები მისი საიტის საშუალებით. უშუალოდ ხალხი აფინანსებს მას და არა მძლავრი კომპანიები. გამარჯვების შემთხვევაში ეს მას მისცემს გაცილებით მეტ დამოუკიდებლობას და მეტ მხარდაჭერას.

ობამას საარჩევნო საიტი შექმნა კრის ხიუზმა, Web 2.0-ის ერთ-ერთმა პიონერმა. საიტი სრულად ემყარება Web 2.0-ის კანონებს, აქვს საკუთარი სოციალური ქსელი, ბლოგები, ჩატები, ონლაინ-შემოწირულობების სისტემა. საიტი აძლევს საშუალებას ობამას მხარდამჭერებს თვოთონ მოაწყონ სხვადასხვა ღონისძიებები და ამით აქტიურად ჩაერთონ საარჩევნო კამპანიაში.

დიდი შედეგი მოიტანა ასევე ინტერნეტ-მემების გავრცელებამ და მათ შორის ყველაზე მნიშვნელოვანი გახდა Obama Girl - ვიდეოკლიპი, რომელიც განთავსებულია YouTube-ზე.

ეს მოვლენები კიდევ ერთი დასტურია იმისა, რომ მსოფლიო სწრაფად იცვლება და ამ ცვლილებების მთავარი მამოძრავებელი ძალა - ახალი საინფორმაციო ტექნოლოგიებია.

ინფორმაცია ემყარება Lenta.ru-ს პუბლიკაციებს.

რაფაელის ”ათენის სკოლა”

რაფაელის ”ათენის სკოლა” - შემოქმედებითი საგანმანათლებლო გარემო!
მომავალში სწავლის გარემო შეიძლება დაუბრუნდეს ამ მოდელს.