მსოფლიოში ყველაზე სწრაფი პროცესორი

17 ნოემბრიდან გაყიდვაშია პროცესორი Intel Core i7. ეს Intel-ის პირველი ჭეშმარიტად ოთხბირთვიანი პროცესორია. აქამდე არსებული Core 2 Quad წარმოადგენდა ერთ კორპუსში გაერთიანებულ Core 2 Duo ორ ბირთვს.
ახალი პროცესორის თავისებურებაა ის, რომ მას დაემატა მესამე დონის კეში და ასევე პროცესორში გადაინაცვლა ოპერატიული მეხსიერების კონტროლერმა, რაც მნიშვნელოვნად ზრდის კომპიუტერის მუშაობის სისწრაფეს.
ბაზარზე წარმოდგენილია პროცესორის სამი მოდელი: Core i7-920, Core i7-940 და Core i7-965 Extreme Edition.

ცხრილში წარმოდგენილია ამ მოდელებისა და Intel-ის პროცესორების წინა მოდელების ძირითადი მახასიათებლები:

სწრაფი ჩანაწერები - 30 ნოემბერი

სწავლის დიფერენციაციის შესახებ

მოსწავლეების მრავალფეროვნება დიდ პრობლემებს უქმნის მასწავლებელს.
კლასში ერთად შეიძლება სწავლობდნენ მოსწავლეები, რომელთათვის ქართული არ არის მშობლიური ენა, მოსწავლეები, რომლებიც ვერ კითხულობენ ასაკის შესაბამისად, მოსწავლეები ქცევის, ყურადღებისა და მოტივაციის პრობლემებით, მოსწავლეები სხვადასხვა კულტურული დონის ოჯახებიდან, ნიჭიერი მოსწავლეები. კლასში შეიძლება აღმოჩნდნენ უნარშეზღუდული, მაგალითად, დაბალი მხედველობის მოსწავლეები.

მეორეს მხრივ არსებობს მკაცრი სტანდარტები, რომელთა მოსწავლეების მიერ მიღწევის უზრუნველყოფა სავალდებულოა მასწავლებლისათვის. არსებობს ერთგვარი წინააღმდეგობა მოსწავლეთა მრავალფეროვნებასა და ყველაზე ერთნაირ პასუხისმგებლობას შორის.

ამ წინააღმდეგობის გადასალახვად საჭიროა ძალიან მოქნილი სასწავლო გეგმის შექმნა, სადაც გამოიყენება ისეთი ინსტრუმენტები, რომლებიც საშუალებას მოგვცემენ თითოეული მოსწავლე ეფექტიანად ავამუშავოთ. ეს, თავის მხრივ, მოითხოვს მნიშვნელოვან ცვლილებებს ტრადიციულ სწავლაში.

ისტორიულად, როცა ხსნიდნენ ინდივიდუალურ განსხვავებებს სწავლაში ეფუძნებოდნენ იმ მოსაზრებას, რომ ტვინი მთელ ზედაპირზე თითქმის ერთგვაროვანია და რომ მისი სხვადასხვა ნაწილების როლი სწავლაში ბევრად არ განსხვავდება ერთმანეთისგან. სწორედ ეს იდეა უდევს საფუძვლად სწავლისა და ინტელექტის ერთგანზომილებიან ხედვას, რომელიც წარმოდგენილია, მაგალითად, ინტელექტის გაზომვაში IQ ქულებით. ამის საწინააღმდეგოდ, ბოლო წლების თეორიების თანახმად, მაგალითად, ჰოვარდ გარდნერის მრავალმხრივი ინტელექტის თეორიის, მოსწავლეებს არა აქვთ სწავლის ერთი გლობალური შესაძლებლობა, არამედ სწავლის მრავალასპექტიანი შესაძლებლობები და, რომ შეზღუდულობა ან პრობლემები ერთ სფეროში შეიძლება გადაიფაროს ექსტრაორდინალური შესაძლებლობებით სხვა სფეროში.

უფრო მეტიც, ხშირად მოსწავლის შესაძლებლობის შეფასება კი არ ხდება, არამედ იმ მედიუმის, რომელიც გამოიყენება შეფასების წარმოებისას. მაგალითად, მოსწავლემ, რომელსაც აქვს პრობლემები ბეჭდვითი ტექსტის აღქმაში და გაგებაში, შეიძლება გამოიჩინოს ექსტრაორდინალური უნარი გრაფიკულ და ვიდეო გარემოში.

ამ პრობლემის გადაჭრაში მნიშვნელოვანი როლი შეიძლება ითამაშონ თანამედროვე ტექნოლოგიებმა, რომლებიც საშუალებას გვაძლევენ მრავალასპექტიან ინდივიდუალურ განსხვავებებს მოსწავლეებში დავუპირისპიროთ მრავალფეროვანი მედია, ინსტრუმენტები და მეთოდები. ციფრული ტექნოლოგიების მოქნილობა საშუალებას გვაძლევს მოვარგოთ ისინი ერთმანეთისგან განსხვავებულ მოსწავლეებს, რაც შესაძლებელს გახდის, რომ მასწავლებელმა: (1) განასხვავოს ის პრობლემები, რომლებსაც მოსწავლეებს უქმნიან სხვადასხვა მედია საშუალებები, სწავლის სხვა, უფრო ზოგადი პრობლემებისგან; (2) გამოაღვიძოს მოსწავლეების ძლიერი მხარეები და ინტერესები, რომლებიც ბლოკირებულია მხოლოდ ბეჭდვითი ტექსტის გამოყენებით.

---

მოსწავლეზე-ორიენტირებული სწავლის შესახებ

დამოუკიდებელი სწავლა ნიშნავს, რომ ადამიანები პასუხს აგებენ საკუთარ სწავლაზე. პერსონალური პასუხისმგებლობის ღერძი არის რწმენა, რომ სწავლა შეიძლება წარმატებული იყოს შესაბამისი ძალისხმევის შედეგად.

მოსწავლეზე-ორიენტირებულ დიზაინს სწავლაზე კონტროლი გადააქვს მოსწავლის ხელში. მოსწავლეს უნდა ჰქონდეს შესაძლებლობა გადაწყვიტოს რა არის მისთვის მნიშვნელოვანი და რელევანტური.

კურსების ნაცვლად დიზაინერები უნდა განიხილავდნენ სწავლას, როგორც აქტივობას დასაწყისისა და დასასრულის გარეშე. პედაგოგიური დიზაინერის ამოცანა არის სწორი გარემოს შექმნა მუდმივი სწავლისათვის. მოსწავლეებმა თვითონ უნდა მოიძიონ და დაეუფლონ ცოდნის საჭირო ელემენტებს.

საყურადღებო ტენდენციები

ამონაწერები სტატიიდან, სადაც საუბარია ტექნოლოგიების მიერ განპირობებულ ოთხ ტენდენციაზე, რომლებიც გვაძლევენ მსოფლიოსა და საკუთარი თავის შეცვლის უპრეცედენტო შესაძლებლობებს. ამ ტენდენციების რეალიზაციით შეიძლება შეიქმნას ქსელებითა და კომპიუტერებით უზრუნველყოფილი გლობალური ცნობიერება.

ეს ტენდენციები დიდ გავლენას მოახდენენ განათლებაზე, მოგვცემენ ადამიანის სწავლის ეფექტიანობის გაზრდის არნახულ შესაძლებლობებს.

ტენდენცია #1: პარალელური გამოთვლები (Parallel computing)
ჩვენ ასე ვიცით, რომ ტრადიციულად ერთი კომპიუტერი დროის მოცემულ მომენტში მუშაობს ერთ პრობლემაზე. ეს თანამიმდევრობითი გამოთვლებია (serial computing). პარალელური გამოთვლები გულისხმობს შემდეგს: კომპლექსური ამოცანა იყოფა მცირე ქვეამოცანებად, რამოდენიმე კომპიუტერს ევალება ერთდროულად ამ ნაწილების დამუშავება, ბოლოს ხდება თითოეული კომპიუტერის მუშაობის შედეგების გაერთიანება და გამოსავალი შედეგის უნიფიცირება. თეორიულად, პარალელური გამოთვლების წარმოებისათვის, შესაძლებელია მსოფლიოში არსებული ყველა კომპიუტერის გაერთიანება ერთ სისტემაში.

პარალელური გამოთვლების საშუალებით შესაძლებელია უზარმაზარი რაოდენობის ინფორმაციის დამუშავება. მაგალითად, უდიდესი ევროპული ფიზიკური ლაბორატორიის (CERN-ის) პარალელური გამოთვლების სისტემა გათვლილია წელიწადში 15 პეტაბაიტ (petabytes) ინფორმაციის დამუშავებაზე ერთი წლის განმავლობაში (1 პეტაბაიტი უდრის მილიონ გიგაბაიტს. Facebook-ში მომხმარებელთა ფოტოების მოცულობა შეადგენს 1 პეტაბაიტს).

ასეთი შესაძლებლობების მქონე სისტემები საშუალებას მისცემს მეცნიერებს განახორციელონ სხვადასხვა რთული მოვლენების მოდელირება და მოახდინონ, მაგალითად, სხვადასხვა ბუნებრივი კატასტროფების პროგნოზირება, გაერკვნენ დაავადებების გავრცელების მექანიზმებში, დაინახონ თუ როგორ რეაგირებს ადამიანის ტვინი, მაგალითად, სხვადასვა პედაგოგიურ მეთოდებზე, რაც საშუალებას მოგვცემს განვსაზღვროთ ეფექტიანი პედაგოგიური სტრატეგიები და შევათავსოთ ეს სტრატეგიები თითოეული ადამიანის სწავლის სტილს.

ტენდენცია #2: Cloud computing

ტერმინით Cloud computing (”Cloud” - ”ღრუბელი”) აღნიშნავენ კონცეფციას, რომლის თანახმად პროგრამული უზრუნველყოფა განთავსდება არა ლოკალურ კომპიუტერზე, არამედ მძლავრ სერვერებზე და ხელმისაწვდომი იქნება ინტერნეტით ან რაიმე მსგავსი ქსელით. ამ კონცეფციას შეეფერება ასევე ტერმინი World Wide Computer.

ჯერ კიდევ 1993 წელს, Eric Schmidt-მა, Google-ის ამჟამინდელმა აღმასრულებელმა დირექტორმა, იწინასწარმეტყველა, რომ როცა ქსელების სისწრაფე გაუტოლდება მიკროპროცესორის სისწრაფეს, კომპიუტერი ფაქტიურად ”გაიჟღინთება” ქსელში ანუ ქსელი გახდება კომპიუტერი.

შეიძლება ითქვას, რომ ამ კონცეფციის თანახმად კომპიუტერული რესურსები ელექტრობის მსგავსად გავრცელდება. მაგალითად, როცა ვრთავთ მტვერსასრუტს, ჩვენ არ გვაინტერესებს, საიდან მოდის ელექტროენერგია და რა პრინციპით მუშაობს ხელსაწყო. ჩვენ უბრალოთ ვიყენებთ მას კონკრეტული სამუშაოს შესასრულებლად.

სერვერზე არსებული პროგრამის გამოყენება ერთდროულად მილიონობით ადამიანს შეეძლება. პროგრამული უზრუნველყოფა აქ განიხილება სერვისად, რომელიც ნებისმიერ დროს და ნებისმიერ ადგილიდან არის ხელმისაწვდომი. მაგალითად, მსოფლიოს სხვადასხვა კუთხეში ფუნქციონირებს Google-ის მილიონამდე სერვერი, რომლებიც გვთავაზობენ სხვადასხვა პროგრამულ სერვისებს. ეს მხოლოდ პირველი ნაბიჯებია.
Cloud computing-ი პირდაპირ კავშირშია პარალელურ გამოთვლებთან და მათი განვითარება მნიშვნელოვნად გაზრდის გამოთვლებისა და ანალიზის შესაძლებლობებს.

ტენდენცია #3: ტვინის ფუნქციონირების ასახვა

ტვინი შედგება მილიარდობით ნეირონისგან, რომლებსაც აქვთ ტრილიონობით სინაფსური კავშირები. როცა ჩვენ ვამუშავებთ ინფორმაციას, ხდება სინაფსური კავშირების აქტივაცია ელექტრული იმპულსებით. სპეციალური კომპიუტერიზებული მოწყობილობებით შესაძლებელია ამ იმპულსების ვიზუალიზაცია. ეს საშუალებას მოგვცემს გამოვიკვლიოთ ტვინის აქტივობის არეები სხვადასხვა საქმიანობის, მაგალითად, სწავლის დროს, რაც მოგვცემს ინფორმაციას, თუ როგორ სწავლობენ ადამიანები. ამით შესაძლებელი გახდება სწავლის ინდივიდუალიზაცია, ანუ სწავლის მეთოდების მორგება კონკრეტულ ადამიანზე.



ტენდენცია #4: გლობალური კონვეერი

1908 წელს ფორდის მიერ გამოგონებულმა კონვეერმა მნიშვნელოვნად შეცვალა მსოფლიო. დღეს, გლობალური ეკონომიკის პირობებში, როცა გვაქვს სწრაფი კომუნიკაცია, სწრაფი ტრანსპორტი და კომპიუტერული ქსელების საშუალებით განხორციელებული სწრაფი მენეჯმენტი, შეიძლება ვისაუბროთ გლობალურ კონვეერზე. აღარ არის საჭირო წარმოების ერთ ადგილას, ერთ ქარხანაში განთავსება. ის შეიძლება იყოს განაწილებული სხვადასხვა წერტილებში და ისე აწარმოებდეს პროდუქციას. ეს არა მხოლოდ მნიშვნელოვნად გაზრდის წარმადობას, არამედ, რაც უფრო მთავარია, საშუალებას მოგვცემს მოვახდინოთ პროდუქციის ინდივიდუალიზაცია. გლობალური კონვეერი პარალელური გამოთვლების ანალოგიური კონცეფციაა.

როგორც ვხედავთ, გლობალიზაციის პროცესები მსოფლიოში სულ უფრო გაძლიერდება. ყველა ამ პროცესების საფუძველს წარმოადგენს ტექნოლოგიების განვითარება. ასეთ სამყაროში ფუნქციონირება შეეძლებათ მხოლოდ იმ ადამიანებს, ვისაც ესმით ტექნოლოგიები. ამას კი მხოლოდ ხარისხიანი განათლება უზრუნველყოფს.

მასწავლებლის ცოდნის დიზაინი

ქვემოთ წარმოდგენილი დიაგრამა (Technological Pedagogical Content Knowledge (TPCK)) ძალიან თვალსაჩინოდ ასახავს მასწავლებლის ცოდნას, რომელიც საჭიროა ტექნოლოგიის ინტერგრაციისათვის.


დიაგრამის საფუძველს წარმოადგენს ცოდნის სამი ძირითადი ფორმა: Content Knowledge (C) - საგნის ცოდნა, Pedagogical Knowledge (P) - პედაგოგიური ცოდნა და Technological Knowledge (T) - ტექნოლოგიური ცოდნა. როგორც წესი, სხვადასხვა ტრენინგების დროს ცოდნის ეს ფორმები განიხილება იზოლირებულად, რაც ბადებს უამრავ სირთულეებს ტექნოლოგიის ინტეგრაციის თვალსაზრისით.

თუ განვიხილავთ ამ ფორმების ურთიერთკვეთას, ცოდნის კიდევ ძალიან მნიშვნელოვან ფორმებს მივიღებთ:

Pedagogical Content Knowledge (PCK) - საგნის პედაგოგიური ცოდნა ანუ ისეთი პედაგოგიური მეთოდებისა და სტრატეგიების ცოდნა, რომლებიც გამოიყენება კონკრეტული საგნის სწავლებისას;

Technological Content Knowledge (TCK) - საგნის ტექნოლოგიური ცოდნა ანუ იმის ცოდნა, თუ რამდენად შესაძლებელია ტექნოლოგიების გამოყენება კონკრეტული საგნის სწავლებისას;

Technological Pedagogical Knowledge (TPK) - ტექნოლოგიური პედაგოგიური ცოდნა ანუ იმის ცოდნა, თუ როგორ აძლიერებს ტექნოლოგია კონკრეტულ პედაგოგიურ მეთოდებსა და სტრატეგიებს.

დიაგრამის ცენტრში, სამივე წრეს გადაკვეთაზე, ვიღებთ ცოდნის ყველაზე მნიშვნელოვან ფორმას: Technological Pedagogical Content Knowledge (TPCK) - საგნის ტექნოლოგიური და პედაგოგიური ცოდნა. ეს არის კომპლექსური ცოდნა, რომელიც საწინდარია ტექნოლოგიების წარმატებული ინტეგრაციისა კონკრეტული საგნის სწავლაში.

ბრძოლას მუდამ აქვს აზრი

საინტერესო საიტები - 25 ნოემბერი

TimeSearch









სპეციალიზირებული საძიებო სისტემა. უნდა განვსაზღვროთ გეოგრაფიული არეალი, თემა და დროის პერიოდი და მივიღებთ დათარიღებულ ისტორიულ ინფორმაციას.

Keyboardr
ახალი საძიებო სისტემა. ძებნას ახორციელებს ერთდროულად Google-ში, Google Images-ში, Wikipedia-ში და YouTube-ში. ძებნის კომბინირებული შედეგი აისახება ერთ გვერდზე.

GetBodySmart
ადამიანის ანატომია და ფიზიოლოგია. ძალიან საინტერესო, თვალსაჩინო ინტერაქტიული ონლაინ პროგრამა, რომლის გამოყენება შეუძლიათ ბიოლოგიის მასწავლებლებს.

21 საუკუნის სწავლა

21 საუკუნის სწავლა უნდა განიხილებოდეს სამი უმნიშვნელოვანესი ფაქტორის კონტექსტში:

გლობალიზაცია (Globalization) - რომელიც ხასიათდება გლობალური ურთიერთდამოკიდებულებით და კონკურენციით;

ტექნოლოგიური ინოვაციები (Technology Innovations) - რომლებიც გვაძლევენ რესურსების წვდომის და მოსწავლეზე ორიენტირებული გარემოს შექმნის არნახულ შესაძლებლობებს;

თანამედროვე მეცნიერული კვლევები, რომლებიც ხსნიან, თუ როგორ სწავლობენ ადამიანები.

ცოდნის ტრანსფორმაცია

სწავლების ახალი მეთოდები სულაც არ გულისხმობენ, რომ შინაარსობრივი ცოდნა არ არის მნიშვნელოვანი. პირიქით, 21 საუკუნის განათლება უნდა იყოს დაფუძნებული სოლიდურ შინაარსობრივ ცოდნაზე. მაგრამ ეს ცოდნა არ გულისხმობს ამა თუ იმ სფეროში იზოლირებული ფაქტების დაგროვებას და დამახსოვრებას.

ცოდნა არის პროცესი და არა პროდუქტი. ჩვენ არა უნდა დავაგროვოთ მეხსიერებაში მათემატიკური ფაქტები, არამედ ვისწავლოთ მათემატიკური აზროვნება, ჩვენ არა უნდა დავაგროვოთ მეხსიერებაში ისტორიული ფაქტები, არამედ ვისწავლოთ ისტორიული ანალიზი.

მოსწავლეები უკეთ ითვისებენ ძირითად საგნებს, როცა ფოკუსირება ხდება სიღრმეზე.

დღევანდელი საგნობრივი სტანდარტები მიმართულია რაც შეიძლება ფართე თემატიკის დაფარვაზე და არა საგნის ღრმა გაგებაზე. ეს ხელს უშლის საგნის ძირითადი იდეების გაგებას და ათვისებას. საგნის დაუფლება კი სწორედ მისი ძირითადი იდეების გაგებას ეფუძნება.

ასევე მნიშვნელოვანია ის, რომ მოსწავლეებს უნდა შეეძლოთ სკოლაში მიღებული ცოდნის გამოყენება სკოლის გარეთ - სახლში, თემში და სხვა. ცოდნის ტრანსფერის უნარი ყოველდღიურ გარემოში არის ძალიან მნიშვნელოვანი.

კვლევები აჩვენებს, რომ ეს უნარი ვითარდება მაშინ, როცა სწავლისას გამოიყენება რეალური ცხოვრებისეული კონტექსტი. საჭიროა საგნის იდეების დაკავშირება სხვა საგნებთან და ყოველდღიურ ცხოვრებასთან. ამის ერთ-ერთი გზაა - პროექტული სწავლა. პროექტი საშუალებას აძლევს მოსწავლეებს იმავდროულად მოახდინონ კავშირის დამყარება ნასწავლ შინაარსსა და მის გამოყენებას შორის.

სწავლა ტრანსფერისათვის არის საგნის უფრო ღრმად გაგების საფუძველი.

გამოვიყენოთ მთლიანი ტვინი

ბოლო წლებში შექმნილია გაცილებით ზუსტი წარმოდგენები ტვინის მუშაობასთან დაკავშირებით, ვიდრე გასული ასი წლის მანძილზე.

აღმოჩნდა, რომ ტვინის სტრუქტურა არ არის მყარი და წინასწარ განსაზღვრული. სწავლა და პრაქტიკა ახდენს ტვინში პერმანენტულ ფიზიკურ ცვლილებებს, მათ შორის კავშირების რიცხვის გაზრდას ნეირონებს შორის და სისხლძარღვების გამრავლებას და აძლიერებს იმ არეების უჯრედებს, რომლებიც ჩართულია სწავლის პროცესში.

აქედან შეიძლება ბევრი მნიშვნელოვანი დასკვნის გაკეთება. ადამიანები, რომლებიც სხვადასხვა კულტურაში იზრდებიან არა უბრალოდ სხვადასხვა რამეზე ფიქრობენ, არამედ განსხვავებულად აზროვნებენ. გარემო და კულტურა, რომელშიც ადამიანი იზრდება განაპირობებს მისი აზროვნების პროცესებს.

ტვინი მუდმივად ახდენს საკუთარი თავის რეორგანიზებას ადამიანის ცხოვრების მანძილზე, გარე პირობებიდან, ადამიანის პრაქტიკიდან გამომდინარე.

შესაძლებელია მეხსიერების მოცულობის და დამუშავების შესაძლებლობების შეცვლა, ანუ ინტელექტი არ არის ფიქსირებული.

ტვინის რეორგანიზება არ ხდება შემთხვევით, მარტივად და თვითნებურად. ცვლილებები ტვინში ხანგრძლივი ზემოქმედების შედეგად მიიღწევა. ტვინები, რომლებმაც განიცადეს განსხვავებული განვითარების გამოცდილება მოქმედებენ განსხვავებულად. განსხვავებული კულტურის გავლენის შედეგია განსხვავებული აზროვნება.

აქედან გამომდინარე, მოსწავლეების დაყოფა ფართე კატეგორიებად, როგორიცაა სწრაფი და არასწრაფი აზროვნების, უნარიანი და უუნარო, ჩვეულებრივი და არაჩვეულებრივი, არის რეალობის ძალიან გამარტივება. ტვინში სწავლის ქსელების მოდულური ორგანიზება და უაღრესად სპეციალიზირებული ქვეპროცესები ამ ქსელებს შიგნით ცხადყოფენ, რომ თითოეულ მოსწავლეს გააჩნია უნიკალური ასორტიმენტი სიძლიერებებისა, სისუსტეებისა და მიდრეკილებებისა.

დენიალ პინკი თავის წიგნში "A Whole New Mind" ამბობს, რომ ჩვენ ვცხოვრობთ საზოგადოებაში სადაც დომინირებს მარცხენა ტვინი, საზოგადოებაში, სადაც ჭარბობს წრფივი, ლოგიკური, მარცხნიდან მარჯვნივ, ზემოდან ქვემოთ, დასაწყისიდან დასასრულამდე, მცირე პროციებად დაყოფილი ცოდნა და ანალიტიკური აზროვნება. იგივე დამოკიდებულება პრევალირებს სკოლებში.

ტვინის მარჯვენა ნაწილის როლი, რომელიც მართავს პატერნების ანალიზს, შემოქმედებას, თანაგრძნობას, კონცეპტუალურ აზროვნებას, ინტუიციას, კავშირში არ მყოფი იდეების დაკავშირების და რაიმე ახლის შექმნის უნარს, ნაკლებად გამოიყენება.

მაგრამ ის, რის გაკეთებაც მარცხენა ტვინით შეგვიძლია, შეიძლება იქნეს ავტომატიზირებული, გადაცემული კომპიუტერისათვის. ამიტომ მეტი ყურადღება უნდა მიექცეს იმ უნარებს, რომლებსაც მარჯვენა ტვინი მართავს და ადამიანმა უნდა ისწავლოს მთელი ტვინის თანაბრად გამოყენება.

ფოტოების არქივი Google-ისგან

Google-ის კიდევ ერთი საინტერესო ინიციატივა: Google LIFE photo archive. მათ ინტერნეტში განათავსეს ფოტოარქივი, რომელიც შეიცავს 10 მილიონამდე ფოტოს, სადაც წარმოდგენილია ჩვენი პლანეტის ცხოვრება 1750 წლიდან დღემდე.
ამ ფოტოარქივში ძებნა შესაძლებელია ასევე Google image საძიებო სტრიქონიდან. ამისათვის საკვანძო სიტყვას უნდა მივუწეროთ ოპერატორი: "source:life".
ამ არქივს აქვს დიდი საგანმანათლებლო პოტენციალი და მდიდარი რესურსია სხვადასხვა საგნის მასწავლებლებისათვის.

საინტერესო საიტები - 18 ნოემბერი

Literacy with ICT
საიტების კრებული სხვადასხვა საგნის მასწავლებლებისათვის. საიტები კლასიფიცირებულია საგნების და კლასების მიხედვით.

Phun - 2D physics sandbox
მოდელირების ძალიან საინტერესო გარემო. გარემოში შესაძლებელია სხვადასხვა ფიზიკური მოდელების შექმნა და მათი მოქმედების დაკვირვება. აქ ხდება მეცნიერების და ხელოვნების შერწყმა. სასარგებლო ინსტრუმენტია ყველა ასაკის მოსწავლეებისათვის.

ამ ვიდეოკლიპში წარმოდგენილია Phun-ის შესაძლებლობები:



Play Songs by Ear
ონლაინ მუსიკალური პროგრამა, რომელიც გვასწავლის მარტივი მელოდიების დაკვრას.

ტექნოლოგიების და სწავლის მომავალი

ამონაწერები ძალიან საინტერესო სტატიიდან, სადაც საუბარია ტექნოლოგიების განვითარების ტენდენციებზე და სწავლის მომავალზე.

”ახლო მომავალში სწრაფი ინტერნეტის და პორტატული კომპიუტერების კომბინაცია მოიტანს ‘cloud computing’-ის კონცეფციის საყოველთაო გავრცელებას. ამ კონცეფციის თანახმად, თქვენი კომპიუტერი წარმოადგენს არა აპარატურას, არამედ ინტერნეტში განთავსებულ მონაცემებისა და ფაილების კრებულს, რომლის წვდომა შესაძლებელია ნებისმიერი აპარატურული პლატფორმის, მათ შორის მობილური და პორტატული მოწყობილობების გამოყენებით. აქედან გამომდინარე, ადამიანს შეეძლება საკუთარი კომპიუტერული გარემოს წვდომა ნებისმიერი კომპიუტერიდან, სახლში იქნება ის, თუ სამსახურში (სწორედ ამის რეალიზებას აპირებენ Windows 7 -ში). პროგრამული უზრუნველყოფა და მონაცემების შენახვა ასეთი კომპიუტერისათვის უზრუნველყოფილი იქნება სხვადასხვა ინტერნეტ-სერვისების მიერ.

გაიზრდება სპეციალიზირებული კომპიუტერების რიცხვი, როგორიცაა დღეს iPod, ციფრული ფოტო და ვიდეო კამერები, PDA (პერსონალური ციფრული ასისტენტები), GPS (გლობალური პოზიციონირების სისტემები). თვით პერსონალური კომპიუტერების ზომები შემცირდება. დღეს არსებული სამაგიდო კომპიუტერები მალე ჩაბარდება წარსულს.

გაიზრდება ონლაინ-პროგრამების რიცხვი. ის რომ მონაცემების შენახვა და პროგრამული უზრუნველყოფის გამოყენება ონლაინ იქნება შესაძლებელი შეცვლის მოთხოვნებს ოპერაციული სისტემების მიმართ. ეს განაპირობებს უფრო სტაბილური და შედარებით ”მცირე წონიანი” სპეციალიზირებული ოპერაციული სისტემების მრავალფეროვნებას. როგორც ექსპერტები აღნიშნავენ, Vista-ას წარუმატებლობა მისმა ”სიმძიმემ” განაპირობა. განსხვავება ოპერაციულ სისტემებს შორის, რომელიც ხასიათდებოდა მწვავე ბატალიებით Windows, Linux და Mac-ს შორის, სულ უფრო შემცირდება და ეს საკითხი აღარ იქნება აქტუალური.

ინტერნეტთან დაკავშირებული მცირე ზომის პროცესორები ჩაშენებული იქნება ადამიანის ყოველდღიურ ნივთებში. ასეთი ჩიპების შესაძლებლობები ძალიან ფართე იქნება და მათი პროგნოზირება დღეს რთულია.

ახლო მომავალში განათლებაში სულ უფრო გავრცელდება მცირე ზომის კომპიუტერები, რომლებსაც ექნებათ წიგნის, რვეულის და კალმის ფუნქცია.

საკლასო ოთახებში გაჩნდება დიდი ზომის თხელი მონიტორები, რომლებთან დაკავშირება მოსწავლეებს და მასწავლებელბს შეეძლებათ საკუთარი პორტატული მოწყობილობების მეშვეობით. ასევე შემცირდება პროექტორების ზომები. უკვე ახლა გამოჩნდა მობილური ტელეფონები, რომლებსაც შეთავსებული აქვთ პროექტორის ფუნქციები.

ასეთი პორტატული და ხელმისაწვდომი მოწყობილობები სწავლას გახდიან ჭეშმარიტად პერსონალურს და მობილურს. მოსწავლეებს ექნებათ მუდმივი აუდიო და ვიდეო კავშირი ყველასთან, ვისთანაც მოინდომებენ. მულტიმედია ასოცირებული იქნება არა კომპიუტერის აპარატურასთან და პროგრამულ უზრუნველყოფასთან, არამედ თვით პიროვნებასთან. ყველა ადამიანს ექნება საკუთარი ”პროფილი” ხელოვნების, მუსიკის და სხვა მედიის, რომელსაც ნებისმიერ მომენტში მოიხმარს.

დღეს სულ უფრო ხშირად გაისმის, რომ განათლების საფუძველს წარმოადგენენ საუბრები, დისკუსიები. საუბრების შესაძლებლობები უფრო გაიზრდება. ხელმისაწვდომი გახდება მარტივი და მოხერხებული ვიდეო-კონფერენციების ტექნოლოგიები.

დღეს დომინირებს ”საკლასო ოთახის” სწავლის მოდელი: მოსწავლეთა ჯგუფი სწავლობს ერთი და იგივე მასალას, ასრულებს ერთი და იგივე აქტივობებს. ჯგუფს ჰყავს ერთი მასწავლებელი, რომელიც ახდენს სასწავლო პროცესის მართვას. ძალიან დიდი როლი ენიჭება დროს: სწავლის დაწყება, სწავლის ხანგრძლივობა, სასწავლო გეგმა. სწავლის ეს მოდელი იმიტომ დამკვიდრდა, რომ ის ოპტიმალური იყო არსებულ პირობებში. დღეს უკვე შეიმჩნევა ამ მოდელის შეცვლის ტენდენციები, რომლებიც მომავალში უფრო გაძლიერდება. მნიშვნელოვნად გაიზრდება არაფორმალური განათლების როლი. არაფორმალურ განათლებაში საკლასო ოთახის მოდელის შეზღუდვები გაცილებით ნაკლებია. აქ შესაძლებელია საკუთარი სასწავლო გეგმის შედგენა და საკუთარ ტემპში სწავლა. ასეთი სწავლა მეტად ეფუძნება მოსწავლის ინდივიდუალურ მოთხოვნილებებს და არა საკლასო ოთახში განსაზღვრულ ამოცანებს და ხორციელდება მოსწავლის და არა სასწავლო ორგანიზაციის მიერ შედგენილი გრაფიკით.

სწავლის მოდელის შეცვლას განაპირობებს ქსელური ურთიერთობების და სოციალური ქსელების განვითარება. ადრე განათლება ასოცირდებოდა ინდივიდუალურ ან ჯგუფურ სწავლასთან სხვადასხვა მოდიფიკაციებით. დღეს დაემატა ქსელური სწავლა, რომელიც გაცილებით მეტ თავისუფლებას ანიჭებს ინდივიდს. ქსელური სწავლა, ქსელური დისკუსიები არ არის სტრუქტურირებული, ის უფრო მეტად განისაზღვრება მონაწილეების ინტერესებითა და საჭიროებებით. აქ არ არის გამოკვეთილი ლიდერები. აქ არ არის საზღვრები, ნებისმიერს შეუძლია გამოვიდეს ერთი დისკუსიიდან და შეუერთდეს სხვას. ქსელები მუდამ ღიაა ახალი მონაწილეებისათვის.

”სწავლის პერსონალური სივრცე” წარმოადგენს მომავალი სწავლის მოსალოდნელ მოდელს. ეს სივრცე არ არის კონკრეტული ადგილი. სწავლის სივრცე განისაზღვრება იმ ადგილით, სადაც ადამიანი იმყოფება მოცემულ მომენტში: კონკრეტული პროდუქტიული ინსტრუმენტი, ვებ-გვერდი ან ონლაინ თამაში. ამ სივრცეში მისაწვდომია ინტერნეტის ყველა ის რესურსი, რომელიც სჭირდება ადამიანს და რომლებიც განისაზღვრება მისი ინტერესებით და მოთხოვნილებებით. ეს რესურსები შეიძლება იყოს გაფილტრული ინტერნეტ თემის მიერ და შექმნილი სხვადასხვა პროვაიდერების (ავტორების, მასწავლებლების, სხვა მოსწავლეების ან თვით ამ პიროვნების მიერ).

სწავლის პერსონალური სივრცე არ ეფუძნება რესურსების წვდომის პრინციპს. ის უფრო განიხილება როგორც მრავალი სერვისების წვდომის მექანიზმი. ეს სივრცე უფრო კონფერენციის, დისკუსიის ინსტრუმენტია, ვიდრე კონტენტის დაგროვების. ფოკუსი ამ სივრცეში გამახვილებულია შექმნაზე და კომუნიკაციაზე და არა მოხმარებაზე.

სწავლის პროცესს მოეხსნება ორი დიდი შეზღუდვა: დროის და ადგილის ...”

მოკლედ რომ ვთქვათ, ახლო მომავალში ჩვენ გველოდება ბევრი საინტერესო ცვლილებები და მოსაწყენად ნამდვილად არ დაგვრჩება დრო. პრობლემა მხოლოდ იმაშია, რამდენად აღმოვჩნდებით მზად ამ ცვლილებებისათვის.

სწრაფი ჩანაწერები - 17 ნოემბერი

21 საუკუნის მოსწავლე მუდმივად უნდა ეძებდეს პასუხებს შემდეგ კითხვებზე:

• როგორ შევაფასო ინფორმაციის ჭეშმარიტობა?
• როგორ ვისწავლო ეფექტიანი კომუნიკაცია?
• რას ნიშნავს იყო გლობალური მოქალაქე?
• როგორ ვისწავლო უფრო უკეთესად?
• როგორ ვიყო უკეთ დაცული?

ამ კითხვებით იწყება აზროვნება, ინფორმაციის ანალიზი და კრიტიკული შეფასება, კომუნიკაცია. მოსწავლე უნდა გრძნობდეს პასუხისმგებლობას საკუთარ სწავლაზე და მას უნდა შეეძლოს კომპეტენტური დაკვირვება საკუთარი სწავლის პროცესზე. სკოლის უმთავრესი ამოცანაა ამ კომპეტენტურობის უზრუნველყოფა. ამისათვის სკოლა უნდა გახდეს მოსწავლე ორგანიზაცია, სადაც სწავლის კულტია გამეფებული. ასეთ სკოლაში თითოეული მასწავლებელიც უნდა იყოს მოსწავლე, რომელიც მუდმივად სწავლობს. თუ ეს არ იქნა გაგებული და რეალიზებული, შეუძლებელია განათლების რეფორმის წარმატებაზე საუბარი.

---

მოსწავლეზე ორიენტირებული სწავლა გულისხმობს, რომ ყურადღება ფოკუსირებულია მოსწავლეზე და არა მასწავლებელზე და მის მიერ მასალის პრეზენტაციის მეთოდებზე. ყურადღება უნდა გამახვილდეს იმაზე, თუ როგორ სწავლობს მოსწავლე, რა შესაძლებლობები ეძლევა საკუთარი თავის და საკუთარი ცოდნის წარმოსაჩენად, როგორ ადგენს მასწავლებელი იმას, თუ რას სწავლობს მოსწავლე, რა არის მოსწავლის სუსტი და ძლიერი მხარეები.

---

ტექნოლოგიების გამოყენება სწავლაში არის ძალიან კომპლექსური ამოცანა. ამ ამოცანის მიღწევა შესაძლებელია მხოლოდ მაშინ, როცა მასწავლებელსაც და მოსწავლეებსაც აქვთ ტექნოლოგიური ინსტრუმენტების გამოყენების წინასწარი გამოცდილება. ასეთი გამოცდილება მოსწავლეებმა უნდა მიიღონ ინფორმატიკის (ისტ-ს) გაკვეთილებზე (მიზანშეწონილია ეს მოხდეს სულ გვიან 5-8 კლასებში), ხოლო მასწავლებლებმა ჯერ თვითონ უნდა დაიწყონ ტექნოლოგიების გამოყენება საკუთარ სწავლაში და საქმიანობაში. ამის გარეშე ჩვენში გავრცელებული ”ინტეგრირებული გაკვეთილების” იდეა ვერ იქნება დანერგილი და მხოლოდ ფიქციად დარჩება.

ჩვენ ასევე უნდა გავითვალისწინოთ, რომ ტექნოლოგიის ინტეგრაცია არის ინოვაციური მიმართულება განათლებაში, განათლება კი - ძალიან კონსერვატული სფეროა. ამიტომ სირთულეები ამ საქმეში ძალიან ბევრი იქნება. მაგალითად, ძალიან ხშირად ისმევა კითხვა: ”რატომ არის საჭირო ეს ახალი ტექნოლოგიები, მიდგომები, მეთოდები?”. ამ კითხვის დასმის მოტივაცია სხვადასხვაა. ზოგი სვავს ამ კითხვას იმიტომ, რომ აქვს შიში იმისა რაც არ იცის და არ ესმის. ზოგი იმიტომ სვავს ამ კითხვას, რომ არ სურს რაიმე ახლის სწავლა. ზოგს მართლაც აინტერესებს ახალი ტექნოლოგიების პედაგოგიური ფასეულობა. ჩვენ უნდა გვესმოდეს, რომ წარუმატებელი ცდები ინოვაციური საქმიანობის შემადგენელი ნაწილია. წარუმატებლობა უნდა გახდეს შეცდომების ანალიზის მასტიმულირებელი. საჭიროა მიდგომების მრავალფეროვნება, ღიაობა, დისკუსია, იდეების და გამოცდილების გაცვლა. სწორედ ამის უზრუნველყოფა შეუძლია Web 2.0 ტექნოლოგიებს.

ახალი წიგნიერება

Tim O'Reilly-ის ხედვა თანამედროვე წიგნიერების:

(2005 წელს სწორედ Tim O'Reilly-იმ პირველმა წარმოადგინა Web 2.0 ტექნოლოგიების თავისებურებების განმარტება)

• პატერნების ამოცნობა არის მთავარი
• ღია კოდი, სერვისები და არა პროგრამული პაკეტები, მონაცემების აგრეგატორები და არა პროგრამები. ქსელური ეფექტები არის გადამწყვეტი.
• მიეცით ადამიანებს შესაძლებლობა გაგიზიარონ იდეები
• Web 2.0 სერვისების არსი: ისინი აძლიერებენ ქსელურ ეფექტებს. მთავარია მონაცემები. მონაცემები არის ახალი თაობის Intel Inside
• რა უნდა ვასწავლოთ ადამიანებს. არა ინსტრუმენტები, არამედ როგორ გამოიყენონ ისინი. როგორ მიაღწიონ მონაცემების მოგროვებას. ინფორმაციული ერას მთავარი კომპეტენცია - კოლექტიური ინტელექტის ამოქმედება
• სტატისტიკა, დიზაინი - ახალი წიგნიერების მნიშვნელოვანი ნაწილებია
• რჩევა - ასწავლეთ იმ ადამიანებს, ვისაც არ სჭირდებათ თქვენი დახმარება. მოძებნეთ ის ადამიანები, რომლებიც მოწინავე პოზიციებზეა და მათ ასწავლეთ
• აჩვენეთ, შემდეგ გააკეთებინეთ. გააძლიერეთ ხშირად გამეორებადი წარმატებებით. უზრუნველყავით ადამიანების დაინტერესება ამ პროცესით
• ძალიან მნიშვნელოვანია პრაქტიკა (hands-on)
• შექმენით ერთმანეთის სწავლების შესაძლებლობები
• გააცანით წარმატებული ისტორიები
• შეწყვიტეთ ჩაქუჩის მოფერება, ყურადღება გაამახვილეთ სახლზე. მთავარი არა ტექნოლოგიებია, არამედ ის, რის გაკეთება გვსურს.

Search Cube - ვიზუალური ძებნა

Search Cube არის საძიებო სისტემა, რომელიც მოძებნილი საიტების ვებ-გვერდების გამოსახულებებს ათავსებს სამგანზომილებიანი კუბის ზედაპირზე. მომხმარებელს შეუძლია კუბის ბრუნვა და მისი მთელი ზედაპირის დათვალიერება.

საინტერესო საიტები - 15 ნოემბერი

Math Glossary






მათემატიკური ლექსიკონი მოსწავლეებისათვის (ინგლისურ ენაზე). წარმოდგენილია მათემატიკასთან დაკავშირებული ტერმინების თვალსაჩინო განმარტებები. აქვე შეგვიძლია ტერმინის გახმოვანება.

A Math Dictionary for kids
კიდევ ერთი მათემატიკური ლექსიკონი მოსწავლეებისათვის.

eGlossary
მათემატიკური ტერმინების ლექსიკონი (გახმოვანებით)

Mathwords
ინტერაქტიული მათემატიკური ლექსიკონი.

MathMovesU
სახალისო მათემატიკური თამაში.

Google-ის უჩვეულო გამოყენების მაგალითი

Google-ის თანამშრომლები დააკვირდნენ, რომ ძებნისას გამოყენებული გარკვეული საკვანძო სიტყვების სიხშირე საკმაოდ ზუსტ და სწრაფ (ორი კვირით უფრო სწრაფს, ვიდრე ტრადიციული სისტემები) ინფორმაციას იძლევა გრიპის გავრცელების ტენდენციების შესახებ. მათ ეს ინფორმაცია გაანალიზეს აშშ-სთან დაკავშირებით. ქვემოთ წარმოდგენილია აშშ-ში გრიპის გავრცელების გრაფიკი:

ინტერნეტის ევოლუცია

ანტიკური რომი Google Earth-ში

Google Earth-ში შესაძლებელია ანტიკური რომის შენობების დათვალიერება. ამისათვის გავუშვათ პროგრამა Google Earth და Layers არეში დავაწკაპუნოთ Ancient Rome in 3D

ვიდეოზე უფრო ვრცლად არის ეს შესაძლებლობა აღწერილი

ინტერნეტის გავლენა მოსწავლეებზე

University of Minnesota-ს მკვლევარებმა ჩაატერას კვლევა, თუ რა საგანმანათლებლო ეფექტს იძლევა მოსწავლეთათვის ისეთი სოციალური ქსელები, როგორიცაა MySpace და Facebook. გამოიკვლიეს 16-18 წლის ასაკის ახალგაზრდები აშშ-ს ცამეტ სკოლაში.

აღმოაჩინეს, რომ მოსწავლეები ღარიბ ოჯახებიდან ტექნოლოგიების ფლობის უნარებით არ ჩამორჩებიან თანატოლებს შეძლებული ოჯახებიდან (თუმცა გავრცელებულია აზრი, რომ ოჯახის სოციალური სტატუსი გავლენას ახდენს ასეთი უნარების განვითარებაზე).

აღმოჩნდა, რომ გამოკვლეულ მოსწავლეთა 92% იყენებს ინტერნეტს, 82% იყენებს ინტერნეტს სახლში, 77% აქვს შექმნილი პროფილი რომელიმე სოციალურ ქსელში. კითხვაზე, თუ რა სარგებელს იღებენ სოციალურ ქსელებში მუშაობისას პასუხები ასე განაწილდა:
1) გვინვითარდება ტექნოლოგიური უნარები; 2) გვინვითარდება კრეატულობა; 3) უფრო ღია ვხდებით სიახლეებისადმი; 4) გვინვითარდება კომუნიკაციური უნარები.

კვლევამ აჩვენა ასევე, რომ მათ ვინც ხშირად მუშაობს სოციალურ ქსელებში უნვითარდებათ ის უნარები, რომლებიც ძალიან მნიშვნელოვანია 21 საუკუნეში. ასეთ მოსწავლეებს უყალიბდებათ პოზიტიური დამოკიდებულება ტექნოლოგიების გამოყენებისადმი, ისინი ახდენენ კონტენტის რედაქტირებას და მომართვას და ფიქრობენ ონლაინ დიზაინზე, უზიარებენ სხვებს ორიგინალურ შემოქმედებით ნამუშევრებს. მოსწავლეები ასევე იღებენ ტექნოლოგიებისა და ინფორმაციის უსაფრთხო და პასუხისმგებლიანი გამოყენების გამოცდილებას.

აღმოჩნდა ასევე, რომ მოსწავლეები ნაკლებად არიან ინფორმირებული, თუ რა აკადემიურ და პროფესიულ შესაძლებლობებს იძლევიან ინტერნეტის საიტები.

ასეთი კვლევები ეხმარება მასწავლებლებს გაეცნონ თანამედროვე მოსწავლეების გატაცებებს და უფრო მიმზიდველი გახადონ სკოლები მათი ამ ინტერესების დაკმაყოფილებით.

21 საუკუნეში საჭირო უნარები

21 საუკუნეში უფრო მნიშვნელოვანია ის, თუ რის გაკეთება შეუძლია მოსწავლეს იმ ცოდნის გამოყენებით, რომელიც აქვს, ვიდრე ინფორმაცია, რომელსაც ის ფლობს.

ინფორმაციის ანალიზისა და შეფასების, არსებული ინფორმაციიდან ახალი იდეებისა და ახალი ცოდნის შექმნის უნარები, ყველაზე მნიშვნელოვანი უნარებია. ეს ახალი უნარები არ არის, მაგრამ 21 საუკუნეში მათზე მოთხოვნილება გაცილებით დიდია, ვიდრე ოდესმე ადრე.

თანამედროვე ეკონომიკის თავისებურება მდგომარეობს იმაში, რომ რუტინული, მარტივი სამუშაოების შესრულება ძირითადად კომპიუტერებს ევალებათ . ამიტომ ადამიანისგან მოითხოვება უფრო მეტი ანუ ანალიტიკური და შემოქმედებითი აზროვნება, პრობლემების დასმის და გადაწყვეტის უნარი.

მასწავლებლის მთავარი ამოცანაა - მოსწავლეების აქტიური ჩართვა სწავლაში, მოტივირებული და არა ფორმალური ჩართვა. მასწავლებელი უნდა ფლობდეს მოსწავლეთა სწავლით დაინტერესების დონის გაზომვის მეთოდებს, რათა მან შეძლოს საჭიროებისამებრ სწავლების სტრატეგიების კორექტირება. ვიმეორებ, ეს არ არის ახალი ამოცანები, ადრეც იდგა განათლების წინაშე ეს პრობლემები, მაგრამ 21 საუკუნეში მათ გადამწყვეტი მნიშვნელობა ენიჭება. დღევანდელ ბავშვებს ცხოვრებაში წარმატების მისაღწევად მოუწევთ მთელი ცხოვრების მანძილზე ინტენსიური სწავლა. ამის საფუძველი მათ სკოლაში უნდა მიიღონ.

კონცეპტუალური საუკუნე

ძალიან მნიშვნელოვანი ხედვა 21 საუკუნის არსის. კონცეპტუალური აზროვნება, კონცეპტუალურად მოაზროვნე მუშაკები - 21 საუკუნის მოთხოვნილებაა. კონცეპტუალურად მოაზროვნე ადამიანების მომზადება - 21 საუკუნის განათლების სისტემის მთავარი ამოცანაა.

საინტერესო საიტები - 12 ნოემბერი

HistoGrafica
აქ შესაძლებელია სხვადასხვა გეოგრაფიულ ადგილებთან დაკავშირებული ძველი ფოტოების მოძიება. ფოტოები ატვირთულია ინტერნეტის მომხმარებლების მიერ. შესაძლებელია საკუთარ ქალაქთან ან სხვა ადგილთან დაკავშირებული ფოტოების ატვირთვა.

Kerpoof
საიტი ბავშვებისათვის. საიტზე წარმოდგენილი ინსტრუმენტებით ბავშვებს შეუძლიათ ნახატის, ფილმის ან მოთხრობის შექმნა.

Fantastic Contraption
ძალიან საინტერესო საიტი. წარმოდგენილია ონლაინ თამაში, რომელიც გულისხმობს დინამიური ფიზიკური თავსატეხების ამოხსნას.

Hippocampus
სხვადასხვა საგნების (ალგებრა, ბიოლოგია, ფიზიკა, სტატისტიკა და სხვა) ელექტრონული სახელმძღვანელოების კრებული.

ახალი სათამაშო მოწყობილობა

LevelHead - საინტერესო სამგანზომილებიანი სივრცული თამაში. ადამიანი მოძრაობს ოთახების ლაბირინტში.

YouTube-დან ვიდეი ფაილის გადმოწერა

YouTube-ზე შესაძლებელია იქ არსებული ვიდეოების მოძიება და დათვალიერება. ვიდეოკლიპის ფაილის გადმოწერის შესაძლებლობა არ არის, მაგრამ ამის გაკეთება შეგვიძლია სხვა ვებ-სერვისების დახმარებით, მაგალითად KeepVid სერვისით.

ამისათვის შევასრულოთ შემდეგი მოქმედებები:

1. ბრაუზერის ერთ ფანჯარაში გავხსნათ YouTube-ზე არსებული იმ ვიდეოკლიპის ვებ-გვერდი , რომლის გადმოწერაც გვსურს (ბრაუზერის სამისამართო სტრიქონში აისახება ამ კლიპის URL-მისამართი), ხოლო ბრაუზერის მეორე ფანჯარაში გამოვიძახოთ საიტი მისამართით http://keepvid.com

2. მოვახდინოთ ვიდეოკლიპის URL-მისამართის კოპირება ბუფერში












3. ჩავსვათ კოპირებული მისამართი KeepVid საიტის მთავარი ვებ-გვერდის ზედა ნაწილში წარმოდგენილ URL ველში და დავაწკაპოთ ამ ველის მარჯვენა კიდესთან მდებარე Download ღილაკზე.






URL ველის ქვემოთ, Download links არეში აისახება გადმოწერისათვის საჭირო ინფორმაცია.













4. ვიდეოფაილის გადმოწერა შესაძლებელია ორ ფორმატში: flv და mp4 (mp4 ფორმატი უფრო ხარისხიანია). ამისათვის შესაბამისი ფორმატისათვის განკუთვნილ არეში დავაწკაპოთ მაუსის მარჯვენა ღილაკით Download ბმულზე, კონტექსტურ მენიუში ავირჩიოთ Save Link As და გადმოვწეროთ ფაილი.

გულისხმობით flv ფორმატის ფაილს მიენიჭება სახელი get_video.flv, ხოლო mp4 ფორმატის ფაილს - video.mp4. შეგვიძლია გადმოწერილ ფაილს დავარქვათ ჩვენთვის სასურველი სახელი.

გაკვეთილის დაგეგმვა

სწავლების მაღალი შედეგის მიღწევაში მნიშვნელოვანი როლი ენიჭება გაკვეთილის დაგეგმვას. არსებობს სხვადასხვა მიდგომები დაგეგმვის პროცესისადმი. გაკვეთილის გეგმა შეიძლება იყოს დეტალური ან შემოიფარგლოს მხოლოდ გაკვეთილის ძირითადი ეტაპების მოკლე აღწერით. გაკვეთილის გეგმაში უნდა აისახოს გაკვეთილის მსვლელობის ლოგიკა, დროის განაწილება, ბალანსი ინფორმაციის პრეზენტაციასა და პრაქტიკას შორის, კომუნიკაცია მასწავლებელსა და მოსწავლეებს და თვით მოსწავლეებს შორის და სხვა. ეს ყველაფერი მიმართულია გაკვეთილის ამოცანების მისაღწევად.

ქვემოთ წარმოდგენილია გაკვეთილის გეგმის სტრუქტურა, რომელიც სრულ წარმოდგენას მოგვცემს გაკვეთილის გეგმის კომპონენტების შესახებ.

1. გაკვეთილის მიზანი. მასწავლებელმა პირველ რიგში მკაფიოდ უნდა გამოკვეთოს ის, თუ რის მიღწევა სურს გაკვეთილზე (რა ცოდნა, უნარები, სტრატეგიები უნდა აითვისოს მოსწავლემ).
2. რესურსები. მას შემდეგ რაც მიზანი განსაზღვრულია, საჭიროა იმ რესურსების (როგორც ონლაინ, ასევე ოფლაინ) განსაზღვრა, რომლებიც საჭიროა მიზნის მისაღწევად. ეს ძალიან მნიშვნელოვანი სამუშაოა და წინასწარ უნდა იყოს შესრულებული მასწავლებლის მიერ.
3. მუშაობის (ანუ სწავლის) პროცესი. შემდეგ უნდა მოხდეს სამუშაო პროცესის მოდელირება, რომელმაც უნდა უზრუნველყოს მოსწავლეების ჩართვა გაკვეთილის ამოცანების მიღწევაში. უნდა განისაზღვროს, რამდენად მიმზიდველია, მნიშვნელოვანია მოსწავლეთათვის გაკვეთილის მასალა, როგორ უნდა იქნეს ორგანიზებული მათი ერთობლივი მუშაობა და სხვა.
4. დისკუსია. ძალიან მნიშვნელოვანია მასწავლებელმა დაგეგმოს, თუ როგორ წარმართავს დისკუსიას გაგკვეთილის თემებთან დაკავშირებით. დისკუსია სწავლის ერთ-ერთი უმნიშვნელოვანესი საშუალებაა, რომლის გამოყენება ძალიან გაამდიდრებს სწავლის პროცესს და გახდის მას მიმზიდველს მოსწავლეებისათვის.
5. დრო. ძალიან მნიშვნელოვანია დროის მენეჯმენტი, რაც რეალისტურს გახდის გაკვეთილის მიზნის მიღწევას. უნდა გვახსოვდეს, რომ ჩვენი მთავარი მიზანია ვასწავლოთ მოსწავლეს დამოუკიდებელი სწავლა. ამიტომ დროის მენეჯმენტი მოსწავლეებთან ერთად უნდა ვაწარმოოთ.
6. ტექნოლოგია. გაკვეთილის ყველა ეტაპის განხორციელებაში საჭიროებისამებრ უნდა გავითვალისწინოთ ტექნოლოგიური ინსტრუმენტების გამოყენება. უნდა გვახსოვდეს, რომ ტექნოლოგია არის გაკვეთილის რესურსებით უზრუნველყოფის, ერთობლივი მუშაობის ორგანიზების და მიმზიდველობის ამაღლების საუკეთესო საშუალება.

ნიჭი თუ შრომა?

ამონაწერები სტატიიდან ”The Secret to Raising Smart Kids”, რომელიც გამოქვეყნდა ჟურნალში ”Scientific American”. სტატიაში აღწერილია მრავალთვიანი კვლევის შედეგი, რომელმაც აჩვენა, რომ სწავლის ხარისხი გაცილებით უფრო მაღალია, როცა ყურადღება მახვილდება არა ბავშვის ნიჭზე ან ინტელექტზე, არამედ მის ძალისხმევაზე, შრომაზე.

ნუ შევაფასებთ ბავშვის ნიჭს. ფოკუსირება უნდა მოხდეს ცდაზე (ძალისხმევაზე) და არა ინტელექტზე და ნიჭზე.
ინტელექტზე და ნიჭზე ყურადღების ზედმეტად გამახვილება იწვევს იმას, რომ ადამიანი მტკივნეულად აღიქვავს საკუთარ წარუმატებლობას, ეშინია პრობლემების და არა აქვს სურვილი გამოასწოროს საკუთარი ნაკლოვანებები.

როცა ბავშვი დაწყებით კლასებში ზედმეტი ძალისხმევის გარეშე აღწევს აკადემიურ წარმატებას ის ითვლება ძლიერად და ნიჭით დაჯილდოებულად. ასეთ ბავშვს უჩნდება შინაგანი რწმენა. რომ ინტელექტი არის ბუნებით მინიჭებული და ფიქსირებული და, რომ ბეჯითი სწავლა უფრო უმნიშნელოა, ვიდრე იყო (ან გამოიყურებოდე, რომ ხარ) ძლიერი. ეს რწმენა ასევე უნერგავს მათ აზრს, რომ სირთულეები, შეცდომები და ძალისხმევის გაწევაც კი, უქმნის საშიშროებას მათ ეგოს. ეს ქმნის იმის საშიშროებას, რომ ასეთი ბავშვები ვერ შეძლებენ საკუთარი პოტენციალის განვითარებას.

როცა ბავშვს სჯერა, რომ მისი წარუმატებლობის მიზეზია არასაკმარისი ძალისხმევა, მას გაუადვილდება სირთულეების დაძლევა. ჯიუტი მოსწავლეები არ ფიქრობენ საკუთარ წარუმატებლობაზე და საკუთარ შეცდომებს განიხილავენ პრობლემებად, რომლებიც მათ უნდა დაძლიონ.

მოსწავლეებში არსებობს ინტელექტის ორი ხედვა. ნაწილს მიაჩნია, რომ ინტელექტი არის ფიქსირებული და ბუნებით მინიჭებული და მისი განვითარება შეუძლებელია. შეცდომები და წარუმატებლობა დიდ დარტყმას აყენებს მათ თვითდაჯერებულობას, ვინაიდან ისინი აღიქვავენ შეცდომებს დაბალი ინტელექტის შედეგად, რომლის ამაღლება მათ არ ძალუძთ. მათ არ უყვართ და ერიდებიან სირთულეებს, ვინაიდან იზრდება შეცდომის დაშვების ალბათობა და ამით გამოჩნდება მათი დაბალი ინტელექტი. ასეთ მოსწავლეებს სჯერათ, რომ მეტი ძალისხმევის გაწევა რაიმე პრობლემის გადაწყვეტისას არის იმის დასტური, რომ მათ ნაკლები ნიჭი აქვთ. ასეთი მოსწავლეები მუდამ ცდილობენ, რომ გამოიყურებოდნენ ნიჭიერებად და მათთვის დიდი ძალისხმევის დახარჯვა სწავლაში არის იმის ნიშანი, რომ დაბალი ინტელექტი აქვთ.

დაოსტატებაზე-ორიენტირებული ბავშვები პირიქით თვლიან, რომ ინტელექტი მოქნილია და შესაძლებელია მისი განვითარება სწავლითა და დიდი შრომით. მათ სურთ სწავლა. თუ ადამიანს სჯერა, რომ შეუძლია საკუთარი ინტელექტის ამაღლება, ის აუცილებლად ეცდება ამის განხორციელებას. სირთულეები მათ მატებს ენერგიას. მათთვის წარუმატებლობა, მაგალითად ტესტებში, არის იმის ნიშანი, რომ მეტი უნდა იმუშაონ და მოშინჯონ სწავლის სხვა სტრატეგიები. ასეთი მოსწავლეების ყურადღება მიმართულია სწავლის სტრატეგიებზე და ძალისხმევაზე.

(ჩემი აზრით ზემოთ მოყვანილი მოსაზრებები გარკვეულწილად ასაბუთებენ იმას, რომ სწავლაში უფრო მნიშვნელოვანია პროცესი, ვიდრე შედეგის გაზომვა. მიზანი უნდა იყოს არა მაღალი ნიშნების მიღება ან ტესტების ჩაბარება, არამედ სწავლის პროცესში ჩართულობა. რაც უფრო მეტ ძალისხმევას ხარჯავ სწავლისას, მით მეტად ვითარდება შენი ინტელექტი და საბოლოო შედეგი იქნება აუცილებლად მაღალი. პრობლემა მდგომარეობს იმაში, რომ სწავლის პროცესი იყოს რელევანტური იმ მოთხოვნებისა, რომლებიც აქვს თვით მოსწავლეს და ასევე საზოგადოებას - ჯ.გ.)

ტექნოლოგიური სიახლეები

PC World-ში გამოქვეყნდა ძალიან საინტერესო სტატია, სადაც აღწერილია 15 ახალი ტექნოლოგია, რომლებიც დიდ გავლენას მოახდენენ ჩვენ ცხოვრებაზე. ეს სტატია ეხმიანება ჩემ გუშინდელ გზავნილს ტექნოლოგიების განვითარების ტენდენციები. მოვიყვან ამ სტატიის მცირე ფრაგმენტს.


Memristor

ეს არის ერთელემენტიანი სქემა უნიკალური თვისებებით. მას შეუძლია ელექტრონული მდგომარეობის შენარჩუნება გამორთვის შემდეგაც. ამ თვისებიდან გამომდინარე მოსალოდნელია, რომ ის ახლო მომავალში შეცვლის flash-მეხსიერებას, რადგანაც თეორიულად memristor-ი ამ მეხსიერებაზე იაფი და გაცილებით სწრაფია.

მან შეიძლება ასევე RAM ჩიპებიც შეცვალოს. დღეს არსებულ RAM მეხსიერების ჩიპებში ინფორმაცია იშლება კომპიუტერის გამორთვისთანავე. Memristor-ი დაიმახსოვრებს ოპერატიულ მეხსიერებაში კომპიუტერის გამორთვის მომენტისათვის არსებულ ინფორმაციას და კომპიუტერის ხელმეორედ ჩართვისას, ჩვენ შეგვეძლება შეწყვეტილი სამუშაოს გაგრძელება.

ფასის ასეთი შემცირება და კომპონენტების გაერთიანება საშუალებას მისცემს მწარმოებლებს შექმნან მცირე ზომის კომპიუტერები, რომელთა ჯიბით ტარებაც კი იქნება შესაძლებელი. თანაც ამ კომპიუტერების სიმძლავრე და სისწრაფე დღეს არსებულ კომპიუტერებზე გაცილებით დიდი იქნება.

სავარაუდოთ ამ სქემის აქტიური გამოყენება დაიწყება 2014-2016 წლებში.

32-ბირთვიანი პროცესორი

დღეისათვის 4-ბირთვიანი პროცესორები ჩვეულებრივი მოვლენაა. მაგრამ მალე დაიწყება ”ბირთვების ომემის” დრო. ახლო მომავალში პროცესორების კონკურენტუნარიანობა განისაზღვრება არა ტაქტური სიხშირით, არამედ ბირთვების რაოდენობით. ბირთვების რაოდენობის გაზრდა მოითხოვს ჩიპების მინიატურიზაციას. მაგალითად, Intel-ი უკვე 2009 წელს აპირებს 32-ნანომეტრიან ტექნოლოგიაზე გადასვლას (დღეს გამოიყენება 45-ნანომეტრიანი ტექნოლოგია).

Intel-ის ყურადღება ფოკუსირებულია პროცესორის ახალ არქიტექტურაზე, სახელწოდებით Nehalem, რომელიც ბაზარზე წარმოდგენილი იქნება Core i7 სახელით. ამ არქიტექტურის 8-ბირთვიანი პროცესორები გამოჩნდება 2009-2010 წელს.

სავარაუდოთ 16-ბირთვიანი პროცესორები გამოჩნდება 2011-2012 წლებში, ხოლო 32-ბირთვიანი - 2013-2014 წლებში. მომდევნო წლებში ეს ტენდენცია გაგრძელდება.

Nehalem-ი და სწრაფი ჩიპები დააჩქარებენ დისკრეტული გრაფიკული პლატების ერას დასრულებას.

მრავალბირთვიან პროცესორებში ბირთვების გარკვეული რაოდენობა დაეთმობა გრაფიკული ინფორმაციის დამუშავებას. ამიტომ ცალკე გრაფიკული პლატები აღარ იქნება საჭირო. ეს ბევრ პრობლემას მოხსნის და კიდევ უფრო გააიაფებს კომპიუტერებს.

USB 3.0

კომპიუტერის პერიფერიული მოწყობილობების მუშაობის სისწრაფე ბევრწილად დამოკიდებულია კომპიუტერთან მათი კავშირის სისწრაფეზე.

სავარაუდოთ USB 3.0 სისწრაფე 10-ჯერ მეტი იქნება USB 2.0-ზე, რაც შეადგენს დაახლოებით 4,8 გიგაბიტ ინფორმაციას წამში.

ეს მოწყობილობა დაახლოებით 2010 წლისთვისაა ნავარაუდევი.

ელექტროენერგიის გადაცემა კაბელის გარეშე

Intel-ის მკვლევარებმა შეიმუშავეს მეთოდი, რომელიც ელექტროენერგიის რამოდენიმე ათეულ სანტიმეტრ მანძილზე უკაბელოდ გადაცემის შესაძლებლობას იძლევა. უკვე დღეს ამ მეთოდით შესაძლებელია 60 ვატიანი ნათურას ანთება.

ეს ტექნოლოგია საშუალებას მოგვცემს, მაგალითად, დისტანციურად დავტენოთ ნოუთბუქის ან მობილური ტელეფონის ელემენტები. მისი საყოველთაო გავრცელება ნავარაუდევია 6-8 წლის შემდეგ.

ტექნოლოგიების განვითარების ტენდენციები

ჩვენ ვცხოვრობთ დიდი ცვლილებების ერაში. ცვლილებები არ არის დროებითი და არ უნდა გვეგონოს, რომ გარკვეული დროის შემდეგ ყველაფერი თავის ნორმას დაუბრუნდება. ყალიბდება უწყვეტი, სწრაფი ცვლილებების ერა. ეს არის ექსპონენტური ცვლილებების ერა.

სხვა მნიშვნელოვან ფაქტორებთან ერთად ამ ცვლილებებს ბევრწილად განაპირობებს ტექნოლოგიების ექსპონენტური განვითარების ტენდენციები. წარმოვადგენ ოთხ ძირითად ტენდენციას, რომლებიც უდიდეს გავლენას ახდენენ ჩვენ ცხოვრებაზე.

ტენდენცია #1: მურის კანონი.

Intel-ის თანადამფუძნებელმა ჯონ მურმა 1963 წელს ჟურნალ ”ელეკტრონიკაში” დაწერა სტატია, სადაც ჩამოაყალიბა ”მურის კანონი”, რომელიც ასე ჟღერდა: ”ყოველ 24 თვეში ინტეგრირებულ სქენაში ტრანზისტორების რაოდენობის გაორმაგებაა შესაძლებელი”. ეს კანონი დღემდე მოქმედებს და უფრო გაძლიერდა კიდევაც. დღეს შეიძლება ითქვას, რომ კომპიუტერის სისწრაფე და სიმძლავრე ყოველ 18 თვეში ორმაგდება, ხოლო მისი ფასი წელიწადში მესამედით მცირდება.

ამ ტენდენციის თანახმად 2018 წლისათვის მივიღებთ კომპიუტერის შემდეგ მაჩვენებლებს:

მეხსიერება: 104032 Mb
დისკის მოცულობა: 20480 Gb
სისწრაფე: 612000 mhz
კომპიუტერის ფასი: 2,72$

ეს პროგნოზი უფრო დამაჯერებელი რომ გახდეს მოვიყვან დამატებით ფაქტებს.
1974 წელს უბრალო კალკულატორი, რომელიც მხოლოდ ოთხ არითმეტიკულ ოპერაციას ასრულებდა აშშ-ში 795$ ღირდა და მის გადასაადგილებლად სპეციალური მოწყობილობა იყო საჭირო. 1980 წელს, იმ დროისათვის ყველაზე მძლავრ სუპერკომპიუტერს (Cray supercomputer) ჰქონდა 8 Mb მეხსიერება და მისი სიხშირე შეადგენდა 80 mhz. ეს კომპიუტერი ღირდა 12 მილიონი დოლარი.

მეცნიერების აზრით მურის კანონი კიდევ 15-20 წელიწადი იმოქმედებს, ხოლო მოლეკულარული ელექტრონიკის განვითარებამ ეს პერიოდი შეიძლება 50 წლამდე გაზარდოს.

ტენდენცია #2: ფოტონის კანონი.

1983 წლიდან ქსელების გამტარიანობა ერთ დოლარზე ყოველ 12 თვეში სამმაგდება.
თუ დღეს ოპტიკური ხაზის გამტარიანობა შეადგენს 10 გიგაბაიტ ინფორმაციას წამში, ახლო მომავალში გამტარიანობა მიუახლოვდება 10 ტრილიონ ბიტ ინფორმაციას წამში (ამ სიჩქარით შესაძლებელია ამერიკის კონგრესის ბიბლიოთეკის მთელი ინფორმაციის ერთ წამში გადაცემა).

სწრაფად ვიტარდება უკაბელო ქსელების ტექნოლოგიები. ახლო მომავალში ჩვენ შეგვეძლება ნებისმიერ წერტილიდან მაღალსიჩქარიან ქსელში ჩართვა.

ტენდენცია #3: ინტერნეტის რევოლუცია.

1992 წელს ინტერნეტის მომხმარებელთა რიცხვი შეადგენდა 300 ადამიანს.
დღეს მათმა რიცხვმა მილიარდს გადააჭარბა.

ინტერნეტი ორჯერ იზრდება ყოველ 120 დღეში.

ყველა მედიასაშუალებები, რომლებიც ადრე ცალ-ცალკე ვითარდებოდა, დღეს ინტერნეტში ერთიანდება.

არსებული ყველა მედია, დაწყებული წიგნით და დამთავრებული ტელევიზიით არის ერთმხრივი - ის მხოლოდ მიაწვდის ინფორმაციას მომხმარებელს. ინტერნეტი ორმხრივი მედიაა - ის აწვდის და იღებს ინფორმაციას.

ინტერნეტი არის მედიუმი, სადაც ვლინდება მრავალმხრივი ინტელექტის ცნების აქტუალურობა. ინტერნეტი ახდენს ინტელექტის მრავალი ფორმის რეალიზებას - აბსტრაქტული, ტექსტური, ვიზუალური, მუსიკალური, სოციალური და სხვა.

მასწავლებლებს ეძლევა შანსი შექმნას მედიუმი, რომელიც საშუალებას მისცემს მოსწავლეს ჩაერთოს სწავლაში მისთვის ყველაზე ხელსაყრელად და მოხერხებულად. ეს არის კარგი საშუალება შევათავსოთ მედიუმი და ადამიანის სწავლის სტილი.

ტენდენცია #4: მოზღვავებული ინფორმაცია.

წინა სამი ტენდენცია განაპირობებს მეოთხე ტენდენციას, რომელიც გამოიხატება ინფორმაციის მოზღვავებაში.

აქსპონენტურად იზრდება სიტყვების, ტერმინების, ცნებების რიცხვი.
დღეში გამოიცემა 3000 წიგნი.

ახალი ტექნიკური ინფორმაცია ორმაგდება ყოველ 2 წელიწადში ანუ ბავშვის სკოლაში სწავლის პერიოდში ინფორმაცია 64-ჯერ იზრდება. მაგრამ მეცნიერები ვარაუდობენ, რომ ეს ტენდენცია შეიცვლება და ახლო მომავალში ინფორმაცია გაორმაგდება ყოველ 2 კვირაში.

შეიძლება ითქვას, რომ ინფორმაცია მნიშვნელოვანია და ხელმისაწვდომია, მაგრამ ის სწრაფად ძველდება და უვარგისი ხდება.

შეიძლება ვინმემ თქვას, რომ არსებული ინფორმაციის უდიდესი ნაწილი ქაოტური და უსარგებლოა. მაგრამ ეს არგუმენტი უფრო ართულებს პრობლემას. ასეთ ვითარებაში ძალიან რთულია საჭირო ინფორმაციის მოძიება და მისი შესაბამისობის დადგენა. სწორედ ეს უნარია ერთ-ერთი უმნიშვნელოვანესი უნარი, რომელიც ყველა ადამიანმა უნდა გამოიმუშაოს.

ზემოთ მოყვანილი ფაქტები უამრავ კითხვას ბადებს.

რა გავლენა ექნება ამ ცვლილებებს ჩვენ ცხოვრებაზე და პროფესიულ საქმიანობაზე? რა გავლენას მოახდენენ ჩვენ ბავშვებზე? რა ცვლილებები უნდა მოხდეს სასწავლო გეგმებში, შეფასებაში, სკოლის გარემოში? როგორი უნდა იყოს მასწავლებელთა მომზადება? როგორ უნდა მოვამზადოთ მოსწავლეები, რომ მათ შეძლონ არა მხოლოდ ტესტებისა და გამოცდების ჩაბარება, არამედ დაეუფლონ 21 საუკუნის წიგნიერებას? და ბოლოს, რას ნიშნავს განათლებულობა 21 საუკუნეში?

ის ფაქტი, რომ გლობალურ ეკონომიკაში ყველგან და ნებისმიერ დროს უაღრესად სწრაფად იქნება მისაწვდომი ინფორმაციის დიდი ნაკადები, მოახდენს თუ არა გავლენას ბავშვებისათვის საჭირო უნარებზე, ცოდნასა და აზროვნებაზე?

ამ კითხვებზე პასუხების დროულად მოძებნა ძალიან მნიშვნელოვანია განათლების სისტემის განვითარებისათვის.

საინტერესო საიტები - 7 ნოემბერი

Newseum
ამ საიტზე წარმოდგენილია მსოფლიოს სხვადასხვა ქვეყნების ასობით გაზეთის პირველი გვერდების (frontpages) გამოსახულებები. შესაძლებელია მიმდინარე დღის გაზეთების პირველი გვერდების დათვალიერება. წარმოდგენილია ასევე ამ გვერდების თემატური არქივი. ძალიან მდიდარი წყაროა სხვადასხვა პროექტებისათვის და კვლევებისათვის.

National Library of Virtual Manipulatives
ათობით ინტერაქტიული java-აპლეტების კოლექცია, რომელიც მოიცავს მათემატიკის კურსის ყველა თემას. აპლეტები დაყოფილია კლასების მიხედვით. ძალიან მდიდარი რესურსი მათემატიკური ინტერაქტიული აქტივობებისა.

Xpeditions Atlas
მსოფლიოს კონტურული რუკების კოლექცია. შესაძლებელია მათი დაბეჭდვა ან გადმოწერა PDF ფორმატის ფაილის სახით.

ABCya
სასწავლო დანიშნულების ინტერაქტიული კომპიუტერული აქტივობები დაწყებითი კლასების მოსწავლეთათვის.

Kidsknowit
საგანმანათლებლო საიტების კოლექცია ბავშვებისათვის.

ტექნოლოგიური სიმარდე

საინტერესო მოსაზრებები:

”ინფორმაციის გარდაქმნა ცოდნაში ხდება მაშინ, როცა ჩვენ ვიყენებთ იმ ცოდნას, რომელიც უკვე გვაქვს ახალი ინფორმაციის დამუშავების პროცესში.

ისტორია, ბუნებისმეტყველება და მათემატიკა არ არიან დისკრეტული (განცალკევებული) საგნები. ისინი მუდმივ ურთიერთკავშირში არიან. თუ ჩვენ შეგვიძლია კომბინირება ამ საგნებში ნასწავლის და შემდეგ ამ კომბინირებულ ცოდნაზე დაყრდნობით ახალი ინფორმაციის აღქმა და გაგება, ჩვენ შევძლებთ სულ სხვა თვალით დავინახოთ სამყარო”.

ასეთივე ურთიერთკავშირშია ტექნოლოგიური ინსტრუმენტები. ფოკუსირება უნდა მოვახდინოთ არა ინსტრუმენტის ათვისებაზე მხოლოდ, არამედ მის გამოყენებაზე. ტექნოლოგიური წიგნიერება, ტექნოლოგიური სიმარდე ნიშნავს უნარს დაადგინო რა ინსტრუმენტები გჭირდება კონკრეტული პრობლემის გადასაწყვეტად და ამ ინსტრუმენტების დახმარებით გადაწყვიტო ეს პრობლემა. აქვე უნდა შეგვეძლოს იმის გათვალისწინება, რომ ერთი და იგივე პრობლემის გადაწყვეტა შესაძლებელია სხვადასხვა გზებით.

ისტ-ს სწავლებისას ჩვენ პერიოდულად უნდა ვუბრუნდებოდეთ ადრე ნასწავლ ინსტრუმენტებს. ისეთი პრობლემები და დავალებები უნდა შევარჩიოთ, რომ მოსწავლეებს დასჭირდეთ სხვადასხვა ინსტრუმენტების კომბინირება მათ გადასაწყვეტად.

მოსწავლეები უნდა ფლობდნენ ტექნოლოგიური ინსტრუმენტების ფართე სპექტრს, რათა კონკრეტული პრობლემის გადაწყვეტისას მათ ჰქონდეთ ფართე არჩევანი.

ტექნოლოგიების სწავლებისას ხშირად უნდა მივცეთ მოსწავლეებს შესაძლებლობა ისწავლონ ერთმანეთისგან.

თანამედროვე მასწავლებელი

საინტერესო საიტები - 5 ნოემბერი

Meteorite Fragments
საიტზე წარმოდგენილია 6 მეტეორიტის ფრაგმენტი 3-D ფორმატში. შესაძლებელია ამ ფრაგმენტების ბრუნვა მაუსით.

Vincent van Gogh
ვან გოგის მუზეუმის რესურსები. წარმოდგენილია ბიოგრაფიული ინფორმაცია, წერილები, ფოტოები, რეპროდუქციები.

Einstein, Image and Impact
ამერიკის ფიზიკის ინსტიტუტის მასალები აინშტაინის ცხოვრების და შემოქმედების შესახებ.

Virtual Geometry
ვირტუალური გეომეტრია. ოცდაათამდე java-აპლეტი სხვადასხვა საინტერესო აქტივობებით.

Spacesounds
ამ საიტზე შესაძლებელია კოსმოსის, დონოზავრების და კიდევ სხვა ხმების მოსმენა.

BBC - Ancient History
ანტიკური ისტორიის მრავალფეროვანი და საინტერესო მასალები.

სემინარის ჩანაწერები - 4 ნოემბერი

21 საუკუნეში ჩვენ ვსწავლობთ ერთმანეთის სწავლებით, ჩვენ ვსწავლობთ, როცა ვახდენთ იმის გაზიარებას რაც აღმოვაჩინეთ.

საზღვრები აღარ არსებობს - კედლები ინგრევა - მოსწავლეებს შეუძლიათ დაამყარონ კავშირი იმასთან, რასაც სწავლობენ.

თავისუფალი მუშაკები, თავისუფალი საგანმანათლებლო აგენტები, შეიძლება ეს არის მომავლის მოდელი.

პირველად კაცობრიობის ისტორიაში ჩვენ გვიწევს ბავშვების მომზადება მომავლისათვის, რომლის განჭვრეტა არ შეგვიძლია.

ადამიანები სწავლობენ ვინაიდან არიან ქსელის ნაწილი, არიან კავშირში. შეიძლება მათ არ იცოდნენ რაიმე, მაგრამ მათ აქვთ თემი, საიდანაც შეძლებენ ამის გაგებას.

ქსელში, თემში, კავშირებში, თანამშრომლობაშია სწავლის სიძლიერე.

სოციალური ქსელები ასწავლიან ახალგაზრდებს თანამშრომლობას, გუნდურ მუშაობას.

ის თუ როგორ ვეძებთ და ვიყენებთ ინფორმაციას, რის გაკეთება შეგვიძლია ინფორმაციასთან შეიცვალა. ინფორმაცია ხდება ქსელური, ციფრული, ჭარბი, მონაწილეობითი, მკითხველის მიერ მართვადი. ინფორმაციას სულ უფრო ხშირად ვიღებთ უშუალოდ ავტორისგან - ინფორმაციის ტრადიციული გამავრცელებლების გარეშე, როგორიცაა ბიბლიოთეკარი და გამომცემელი.

ჩვენი მოსწავლეები არიან გამომცემლები. ახალგაზრდების 57% აწარმოებს ორიგინალურ კონტენტს, აქვეყნებს მას ინტერნეტში და ჩართულია საუბრებში მათთან, ვინც მათ პროდუქციას ეცნობა (რამდენი მასწავლებელი მოქმედებს ასე?). მოსწავლეების ინფორმაციული გამოცდილებიდან გამომდინარე, ისინი ინფორმაციულად უფრო წიგნიერნი არიან, ვიდრე მათი მასწავლებლები.

სწავლება ჩვენ გვეხმარება სწავლაში. როცა მოსწავლეები ასწავლიან თანატოლებს/მასწავლებლებს, ისინი უფრო ღრმად სწავლობენ.

უნდა დავაკვირდეთ, თუ როგორ სწავლობენ მოსწავლეები და ისე ვასწავლოთ მათ. უფრო ხშირად უნდა შევეკითხოთ მათ თუ რას სწავლობენ, როგორ სწავლობენ და მათი ნაამბობიდან გამომდინარე ჩამოვაყალიბოთ ჩვენი სწავლების სტრატეგიები.

მთავარი სიახლე, რომელიც ახლა ხდება, არის ქსელური საუბრები. ეს საუბრები არის სწავლის გასაღები.

საკლასო ოთახი, სადაც არ არის ციფრული, ქსელური ინფორმაცია - ანაქრონიზმია!

საკლასო ოთახის დიზაინის ნიმუში

ამ საკლასო ოთახის ფოტოები შემხვდა ინტერნეტში. ჩემი აზრით საინტერესო ნიმუშია საკლასო ოთახის მოწყობის. საკლასო ოთახის დიზაინი კარგი ინდიკატორია იმისა, თუ სწავლის რა მეთოდებს იყენებს ოთახის პატრონი ანუ მასწავლებელი.






















































































საკლასო ოთახის მოწყობა მასწავლებლის სრული პრეროგატივაა და აქ არავინ არ უნდა ჩაერიოს. ბოლო დროს საკმაოდ ხშირად საუბრობენ, რომ სასწავლო გარემოს მოწყობის მოდელად ეფექტიანია სტუდიის მოდელი (სტუდიის მოდელი გამოიყენება მხატვრების, დიზაინერების, არქიტექტორების სამუშაოს ორგანიზებისას).

სტუდიაში მასწავლებელს ეკისრება ოსტატის როლი, რომელიც სტუდიის ლიდერია და მუდმივად სწავლობს სტუდიის სხვა წევრებთან ერთად. ოსტატი საშუალებას აძლევს სტუდიის წევრებს გამოამჟღავნონ შემოქმედება, იყვნენ მუდმივ ძიებაში, არ ეშინოდეთ შემოქმედებითი რისკის და შეცდომის დაშვების. სტუდიის წევრები სწავლობენ ერთმანეთისგან და არა მხოლოდ ოსტატისგან. ეს ერთი მოსწავლე თემია, რომლის მიზანია სწავლა და შემოქმედება.

ამ იდეის განხორციელება მცირეკონტინგენტიან სოფლის სკოლებში უფრო მოხერხდება. ჩემი აზრით ინოვაციური ცვლილებების განხორციელება სოფლის სკოლებში უფრო რეალურია, ვიდრე დედაქალაქის გადატვირთულ სკოლებში.

ცვლილებების მოლოდინში

ხვალ აშშ-ს პრეზიდენტის არჩევნებია.

არ შემიძლია რამოდენიმე სიტყვით არ გამოვეხმაურო ამ მოვლენას. ბარაკ ობამას საარჩევნო კამპანია მიმდინარეობს ცვლილებების საჭიროების დევიზით. მე სავსებით ვეთანხმები ამ მოთხოვნას. ჩემი აზრით, ბარაკ ობამას გამარჯვების შემთხვევაში ჩვენ მნიშვნელოვანი ცვლილებების მოწმენი გავხდებით მთელ მსოფლიოში.

მსოფლიოს განვითარებამ მიაღწია გარკვეულ კრიტიკულ ზღვარს. საინფორმაციო ტექნოლოგიების დახმარებით ცალკეულ ადამიანს გაცილებით დიდი შესაძლებლობები აქვს მონაწილეობა მიიღოს მსოფლიოს ეკონომიკის, მეცნიერების, განათლების განვითარებაში. ამიტომ მას უნდა მიეცეს ამის რეალიზაციის შესაძლებლობა.

21 საუკუნეში მხოლოდ ის სახელმწიფოები შეძლებენ განვითარებას, სადაც უზრუნველყოფილი იქნება თავისუფალი და სამართლიანი გარემო, ინდივიდის თვითრეალიზაციის და ქვეყნის განვითარებაში მონაწილეობის უფლება, ხარისხიანი განათლება და კულტურული თვითმყოფადობა.

ჩემი აზრით ბარაკ ობამას ხედვა გაცილებით უფრო ახლოსაა ამ მოთხოვნებთან. კარგი იქნება, თუ ეს იმედი არ გამიცრუვდება. ამას რამოდენიმე თვეში ვიგრძნობთ.

სწავლის პრინციპები

თანამედროვე სწავლის თეორიის სამი ფუნდამენტალური პრინციპი, რომელთა ცოდნა ძალიან მნიშვნელოვანია მასწავლებლისათვის:

• მოსწავლეები მოდიან კლასში საკუთარი წარმოდგენებით, თუ როგორ არის მოწყობილი სამყარო. თუ მათი ეს საწყისი გაგება არ არის გათვალისწინებული სწავლებისას, მოსწავლეებს შეიძლება გაუძნელდეთ ახალი ცნებებისა და ინფორმაციის აღქმა ან შეიძლება უბრალოდ ისწავლონ ტესტის ჩაბარების მიზნით, მაგრამ სკოლის გარეთ ისევ დაუბრუნდნენ საკუთარ წარმოდგენებს.
• კვლევითი უნარების განსავითარებლად მოსწავლეებს უნდა (ა) ჰქონდეთ ფაქტუალური ცოდნის ღრმა საფუძველი; (ბ) ფაქტები და იდეები უნდა ესმოდეთ კონცეპტუალური სტრუქტურის კონტექსტში; (გ) ცოდნა უნდა ჰქონდეთ ორგანიზებული ისე, რომ გაუადვილდეთ მისი აღდგენა და გამოყენება.
• მეტაკოგნიტური მიდგომა სწავლისადმი ეხმარება მოსწავლეებს ისწავლონ საკუთარი სწავლის კონტროლი სწავლის მიზნების განსაზღვრით და მათი მიღწევის მონიტორინგით.

სწავლის ფუნდამენტური პრინციპია: ახალი გაგება უნდა იქნეს კონსტრუირებული არსებული გაგებისა და გამოცდილების საფუძველზე.

”ცნობისმოყვარე თევზი”. თევზს ძალიან უნდოდა გაეგო რა ხდება წყლის გარეთ, მიწაზე. მას ამის შესახებ უყვება ბაყაყი. ბაყაყმა მოუყვა ჩიტებზე, ცხოველებზე, ადამიანებზე. თევზმა ისინი წარმოიდგინა საკუთარი თვალსაზრისით, როგორც თევზი-ჩიტები, თევზი-ძროხები და თევზი-ადამიანები:









ბავშვებიც ამ თევზის მსგავსად იყენებენ საკუთარ ცოდნას ახალი წარმოდგენებისა და დამოკიდებულებების ჩამოსაყალიბებლად.

მოსწავლეების მიერ ყოველდღიური გამოცდილების საფუძველზე მიღებული წარმოდგენების შეცვლა მასწავლებლისათვის საკმაოდ რთულია, ვინაიდან ისინი ყოველდღიურ კონტექსტში მოქმედებენ. ამ მცადრმა წარმოდგენენბმა შეიძლება სერიოზული ბარიერი შეუქმნას მოსწავლეებს სწავლაში. ხშირად მოსწავლეები მექანიკურად იმახსოვრებენ მასალას (მაგალითად, ფორმულებს ფიზიკაში), მაგრამ ცხოვრებისეული პრობლემების გადაჭრისას ხელმძღვანელობენ საკუთარი გამოცდილებიდან მიღებული ცრუწარმოდგენებით.

რა თქმა უნდა, მოსწავლის გამოცდილება არ არის საკმარისი იმისათვის, რომ შეიცნოს სამყარო. საჭიროა მას მივაწოდოთ შესაბამისი ფაქტობრივი და კონცეპტუალური ცოდნა. მაგალითად, ისეთი კონცეპტუალური ცოდნა, როგორიცაა ადაპტაციის თეორია ვერ იქნება მიღებული მოსწავლის მიერ მისი ყოველდღიური გამოცდილებიდან. სწორედ იმიტომ წარმოიდგინა თევზმა ჩიტები მფრენავ თევზებად, რომ მას არ ჰქონდა ცოდნა, რომ სხვადასხვა გარემოში არსებობის სხვადასხვა პირობებია, ამიტომ ცოცხალი არსებები განიცდიან ადაპტაციას ამ პირობებთან.

სწავლის თეირია და სწავლასთან დაკავშირებული მეცნიერებები სწრაფი ტემპებით ვითარდება:

• კვლევებმა კოგნიტურ ფსიქოლოგიაში გაზარდა ჩვენი გაგება იმისა, თუ როგორ ხდება კომპეტენტურობის განვითარება და ასევე ჩამოაყალიბა ცოდნის ორგანიზების ის პრინციპები, რომლებიც წარმოადგენენ საფუძველს ადამიანის უნარისა გადაჭრას პრობლემები სხვადასხვა სფეროებიდან, როგორიცაა, მეცნიერება, ლიტერატურა, სოციალური მეცნიერებები და ისტროია.
• განვითარების მკვლევარებმა გვაჩვენეს, რომ ბავშვები იგებენ ბიოლოგიის საბაზო პრინციპებსა და ფიზკის მიზეზ/სედეგობრივ კავშირებს, მათემატიკურ ცნებებსა და ლიტერატურულ მოთხრობებს და ეს გვაძლევს საშუალებას შევქმნათ ინოვაციური სასწავლო პროცესი, სადაც ბავშვებს გავაცნობთ მნიშვნელოვან ცნებებს ადრეულ ასაკში.
• სწავლისა და ტრანსფერის კვლევები გვამცნობენ სწავლის გამოცდილების სტრუქტურირების ძირითად პრინციპებს, რაც საშუალებას აძლევს ადამიანებს გამოიყენონ ნასწავლი ახალ სიტუაციებში.
• სოციალური ფსიქოლოგიის, კოგნიტური ფსიქოლოგიისა და ანტროპოლოგიის მიღწევები ნათლად გვაჩვენებენ, რომ სწავლა მიმდინარეობს გარემოში, რომელიც დამოკიდებულია კულტურულ და სოციალურ ნორმებზე და მოლოდინებზე, ამიტომ ეს გარემო ახდენს დიდ გავლენას სწავლის შეგეგებზე და ცოდნის ტრანსფერზე.
• ნეირომეცნიერება ნათელს ხდის ტვინის ფუნქციონირების ძირითად პრინციპებს, რაც გვამცნობს, რომ სწავლა ცვლის ტვინის ფიზიკურ სტრუქტურას და მასთან ერთად მის ფუნქციონალურ ორგანიზებას.
• ტექნოლოგიების გამოყენება ადრე არნახულ შესაძლებლობებს იძლევა სწავლის მხარდასაჭერად და გასაძლიერებლად.

აქედან გამომდინარე ნათელია, რომ დღის წესრიგში დგას სწავლის ტრადიციული მოდელების გამდიდრება ახალი ინოვაციური მეთოდებით და თანდათანობით სრულიად ახალ მოდელებზე გადასვლა, რომელთა არსი ჯერ საკმაოდ ბუნდოვანია.

საინტერესო საიტები - 1 ნოემბერი

Timeline of Computer History
კომპიუტერის ისტორიის დროის სკალა. 1939-1994 წლები.

Keyboarding Links
რესურსები კლავიატურაზე სწრაფი ბეჭდვის შემსწავლელთათვის.

International Children's Digital Library
ციფრული ბიბლიოთეკა ბავშვებისათვის. აქ წარმოდგენილია სხვადასხვა ქვეყნებში გამოცემული საბავშვო წიგნების ელექტრონული ვერსიები. შესაძლებელია ამ წიგნების წაკითხვა ონლაინ. საძიებო სისტემის გამოყენებით შესაძლებელია წიგნების მოძიება სხვადასხვა კრიტერიუმით.

50 Best Websites 2008
2008 წლის 50 საუკეთესო ვებ-საიტები. ჟურნალ Time-ის გამოკითხვით.

Human Anatomy Online
ადამიანის ანატომია. წარმოდგენილია საკმაოდ მრავალფეროვანი რესურსები, მათ შორის ანიმაციური ფრაგმენტები.